45-нҗи хекая

Иордан дерясындан гечйәрлер

СЕРЕТ! Ысрайыллылар Иордан дерясындан гечйәрлер! Йөне деряның сувуна нәме болдука? Бары-ёгы бирнәче минут мундан өң, деряның сувы кенарындан җошярды. Себәби шу вагтлар ягыш көп ягярды. Йөне инди бар сув чекилипдир! Бирвагт Гызыл деңзинден гечиши ялы, ысрайыллылар хәзир гуры дерядан гечйәрлер! Эмма деряның сувуна нәме болдука? Гел, билели.

Ысрайыллылар Иордан дерясындан гечмели боланда, Ехова Ешува халка шу сөзлери айтмагы табшыряр: «Руханылар әхт сандыгыны алып, халкың өңүнден гитмели. Олар Иордана гирен бадына деряның акымы дурар».

Ынха, руханылар әхт сандыгыны гөтерип, халкың өңүнден барярлар. Иордан дерясына барып, сува гирйәрлер. Деря өрән җошгунлы ве чуңды. Йөне олар сува гирен бадына, деряның сувы азалып башлаяр. Бу гудрат! Ехова деряның ёкардан гелйән акымыны бекледи. Шонуң үчинем деряның сувы деррев гутарды.

Руханылар әхт сандыгы билен гуры деряның ортасына барярлар. Олары суратда гөрйәңми? Олар шол ерде дуряр, ысрайыллылар болса Иордан дерясының гуры еринден гечйәрлер.

Ысрайыллыларың хеммеси дерядан геченсоң, Ехова Ешува он ики саны гүйчли адама шу сөзлери айтмагы табшырды: «Әхт сандыгыны деряда гөтерип дуран руханыларың янына барың. Шол ерден он ики саны дашы алың-да, барып дүшлеҗек ериңизде гоюң. Гелеҗекде чагаларыңыз бу дашларың нәме аңладяндыгыны соранда, «Ехова әхт сандыгыны Иордан дерясындан гечиренде, деряның акымы дурды» дийип җогап бериң. Бу дашлар сизе шу гудраты ятладар!» Мундан башга-да, Ешув он ики саны дашы руханыларың деряда дуран еринде гойды.

Соңра Ешув әхт сандыгыны гөтерйән руханылара: «Иордандан чыкың» дийди. Олар чыкан бадына, деряның сувы ене-де шаглап акып башлады.

Ешув 3:1—17; 4:1—18.