Makani 45: Kuzabuka Mulonga wa Jodano
LANGA bana Isilayeli nkobazabuka Mulonga wa Jodano. Pele ino meenda aya kuli? Kayi mvwula ilawa kapati kuciindi eeco camwaka alimwi mulonga walivwide ino-ino aawa. Pele mukaindi buyo kaniini meenda ayuminina! Aboobo bana Isilayeli beenda anyika njumu mbuli mbobakacitide ku Lwizi Lusalala. Ino meenda oonse aya kuli? Atubone nkooko.
Nicakasika ciindi cakuti bana Isilayeli bazabuke Mulonga wa Jodano, nceeci Josyuwa ncaakaambilwa kuli Jehova ikwaambila bantu: ‘Bapaizi boonse beelede kubweza bbokesi lyacizuminano akuunka kumpela lyesu. Baakunjizya buyo maulu mu Mulonga wa Jodano, meenda aya kucileka kweenda.’
Aboobo bapaizi balinyamuna bbokesi lyacizuminano alimwi beendela kumpela lyabantu. Basike ku Jodano, bapaizi banjizya maulu mumulonga. Meenda aleenda canguzu alimwi mulonga ulivwide kapati. Pele maulu aabo mbwaagumina buyo meenda, meenda atalika kucesya-cesya kweenda. Maleele! Nkoutalikila mulonga, Jehova waabikka meenda mubusena bomwe. Mukaindi buyo kaniini, amana do mumulonga!
Bapaizi banyamude bbokesi lyacizuminano baunka akati kamulonga uuyuminide. Hena ulakonzya kubabona acifwanikiso? Kabaimvwi aawo, boonse bana Isilayeli beenda kabazabuka Mulonga wa Jodano anyika njumu.
Bamane kuzabuka boonse, Jehova waambila Josyuwa kwaambila bantu bali 12 basinguzu kuti: ‘Amunjile mumulonga muunke kwiimvwi bapaizi ibajisi bbokesi lyacizuminano. Mubweze mabwe aali 12 akwaalundika mpomuya koona masiku aasunu. Ikutegwa kumpela aamazuba bana banu baakubuzya mabwe aaya ncaapandulula, mukabaambile kuti meenda akalilekede kweenda bbokesi lya Jehova lyacizuminano nilyakazabusyigwa mumulonga wa Jodano. Mabwe ayakumuyeekezya maleele aaya. Awalo Josyuwa wabikka mabwe aali 12 aawo mpobakaimvwi bapaizi mumulonga.
Kumamanino Josyuwa waambila bapaizi banyamude bbokesi lyacizuminano kuti: ‘Amuzwe mumulonga wa Jodano!’ Bazwe buyo meenda atalika alimwi kweenda.
Josyuwa 3:1-17; 4:1-18.
Mibuzyo
- Maleele nzi Jehova ngaakacita kutegwa bana Isilayeli bakonzye kuzabuka Mulonga wa Jodano?
- Nkusyomeka kuli buti bana Isilayeli nkobakacita kutegwa bakonzye kuzabuka Mulonga wa Jodano?
- Nkaambo nzi Jehova ncaakaambila Josyuwa kulundika mabwe mapati aali 12 aakali kumbali aamulonga?
- Ncinzi cakacitika mbobakazwida buyo bapaizi mu Jodano?
Mibuzyo aimwi
- Bala Josyuwa 3:1-17.
Kweelana ambokwatondezyegwa mucibalo eeci, ncinzi ncotweelede kucita kutegwa tukonzye kutambula lugwasyo lwa Jehova alimwi azilongezyo? (Jos. 3:13, 15; Tus. 3:5; Jak. 2:22, 26)
Ino cakali buti mu Mulonga wa Jodano bana Isilayeli nibakazabuka akunjila mu Nyika Yakasyomezyegwa? Alimwi mbuti eeci mbocakapa kuti zina lya Jehova lilemekwe? (Jos. 3:15; 4:18; Int. 66:5-7)
- Bala Josyuwa 4:1-18.
Ino akali kwiiminina nzi mabwe aali 12 aakabwezyegwa mu Mulonga wa Jodano aakabikkwa ku Giligala? (Jos. 4:4-7)
