¡KʼELA! ¡Ja israʼelenyo wane skʼutsjel ja yok jaʼ Jordani! Pe ¿bʼay ja jaʼi? Ja bʼa tyempo jaw jelni xyaʼa jaʼ sok jelni bʼutʼel ay ajyi. ¡Pe ja weʼgo ja jaʼi mixa ayuk! ¡Sok ja israʼelenyo wane skʼutsjel bʼa takin luʼum, jastal skʼulane ja bʼa mar Rojo! Anto, ¿bʼa chʼak wajuk ja jaʼi? La kiltik.

Yajni ja israʼelenyo ojxa skʼuts-e ja yok jaʼ Jordán, jaʼ it ja jas yala Jyoba oj yal yabʼ ja Josué oj skʼuluk ja chonabʼi: «Ja olomal jumasaʼ tʼilan oj skʼech-e och ja kopre bʼa trato sok aʼekʼuke bʼajtan yuja keʼntiki. Yajni ja yeʼnle xyawe koʼuk ja yoke bʼa yok jaʼi, ja jaʼi oj tejkʼajuk».

Ja yuj ja olomal jumasaʼ skʼechawe ja kopre bʼa trato sok ekʼye bʼajtan. Yajni kʼotye ja bʼa Jordán, ja olomal jumasaʼ och ochuke ja bʼa yoj jaʼi. Ja yok jaʼi jel ja yipi sok jel chaʼan. ¡Pe yajni ya koʼuk ja yokeʼi, ja jaʼi weʼgoxta kʼot tekʼan! ¡Jani ja yip ja Dyosi! Ja Jyoba slutuni ja yok jaʼ bʼa kʼax kʼeʼeli. ¡Ja yuj ja jaʼi kʼot tekʼan!

Ja olomalik matik skʼechuneje ja kopre bʼa trato ekʼye och man bʼa snalan ja yok jaʼ bʼa takini. ¿Wan maʼ xbʼobʼ awil ja bʼa dibujo? Malan ja yeʼnle tini tekʼane ekʼ tiw, spetsanil ja israʼelenyo ekʼ skʼuts-e ja yok jaʼ bʼa takini.

Yajni chʼakta skʼuts-eʼi, Jyoba skʼulan ja Josué ayal yabʼ 12 winik bʼa ay lek yipe: «Kaʼaxik ja bʼa tekʼane ekʼ ja olomalik skʼechuneje ja kopre bʼa trato sok bʼa tiw tuluwik 12 ton sok aʼawikan tsoman ja bʼa oj jijlanik ja akʼwali. Jachuk, ja bʼa tyempo jakumto, yajni ja wa wuntikilexi sjobʼowilex jas wa sbʼejan ja tonik it, ojni awal-ex yabʼ yajni ja kopre bʼa trato ekʼ skʼuts ja Jordani, ja jaʼi kʼot tekʼan. ¡Ja toniki jani oj ya juluk akʼujolex ja niwan senya it!». Chomajkil ja Josué stsomo 12 ton sok ti yaʼakan tsoman ja bʼa ajyiye tekʼan ja olomaliki.

Tixa yala yabʼ ja olomaliki ja matik skʼechuneje ja kopreʼi: «Elanikxa jan ja bʼa tekʼanex ekʼi». Yajni skʼulane ja it, ja jaʼi cha kumxi bʼa slugar.