¡KAʼAKXILHTI! ¡Li Israel patakutmakgolh kgalhtuchokgo wanikan Jordán! Pero, ¿niku wi chuchut? Akxni tama kilhtamaku lhuwa senan, chu nina akglhuwa minuto kgalhtuchokgo lu xtsamay. ¡Pero uku nialh anan chuchut! ¡Chu li Israel patakutmakgolh kxakaskakni tiyat chuna la titaxtukgolh kpupunu wanikan xaSpinini! Pero, ¿niku alh chuchut? Kaʼaxilhwi.

Akxni chalh kilhtamaku xlakata li Israel napatakutkgoy kgalhtuchokgo Jordán, Jehová wanilh Josué pi kawanilh kachikin: Wa sacerdotes nakukakgoy caja xla talakkaxlan chu napulakgoy. Akxni natatujokgoy anta kkgalhtuchokgo wanikan Jordán, chuchut natachokgoy.

Wa xlakata sacerdotes kukakgolh caja xla talakkaxlan chu kapulanikgo kristianos. Akxni chankgolh kJordán, sacerdotes tajukgolh kchuchut. Chuchut kgosnama titaxtuma chu pulhman. ¡Pero akxni lakgtajukgolh chuchut, chuchut tunkun tsukulh tachokgoy! ¡Uma nilay tamakanajlay xla Dios! Chuchut nema xmima paʼakxtu Jehová machokgo. ¡Kgalhtuchokgo skakli!

Wa sacerdotes tiku kukakgonit caja xla talakkaxlan chankgolh kxlakʼitat kgalhtuchokgo kxakaskakni. ¿Akxilhpat anta kdibujo? ¡Akxni anta layakgolh sacerdotes, li Israel tsukukgolh patakutkgoy Jordán kxakaskakni tiyat!

Akxni xputumkan xtitaxtukgonit, Jehová wanilh Josué kakawanilh kgalhkutiy lakgtliwakga lakchixkuwin: Kapitit kkgalhtuchokgo niku layakgolh sacerdotes nema kukakgonit caja xla talakkaxlan. Kasaktit anta akgkutiy chiwix chu kawilitit anta niku nalhtatayatit katsisni. Chuna alistalh, kilhtamaku akxni minkamanan nakakgalhskinkgoyan tuku wamputun uma chiwix, nakawaniyatit pi chuchut tachokgolh akxni caja xla talakkaxlan xla Dios titaxtulh kkgalhtuchokgo Jordán. ¡Umakgolh chiwix nakamalakapastakayan uma nilay tamakanajlay xla Dios! Josué tsapswililh akgkutiy chiwix kkgalhtuchokgo anta niku xlayakgolh sacerdotes.

Alistalh Josué kawaniy sacerdotes tiku linkgoy caja xla talakkaxlan: Katakuttit kJordán. Akxni takutkgolh, chuchut tsukupa tlawan.