WONA! Ŵaisrayeli ŵakwambuka Mronga wa Yorodani! Kweni kasi maji ghali nkhu? Cifukwa yikaŵa nyengo ya vura, mronga ukaŵa wakuzura comene. Kweni pa nyengo iyi maji ghose ghakakamuka! Ŵaisrayeli ŵakambuka pa malo gha gwaa nga ni umo ŵakacitira pa Nyanja Yiswesi! Kasi maji ghakaluta nkhu? Tiye tiwone.

Nyengo yakuti Ŵaisrayeli ŵayambukire Mronga wa Yorodani yati yakwana, Yehova wakaphalira Yoswa kuti waphalire ŵanthu mazgu agha: ‘Ŵasofi ŵatore likasa la phangano ndipo ŵadangire. Para malundi ghawo ghakhwaska maji gha Mronga wa Yorodani, maji ghamuleka kwenda.’

Ŵasofi ŵakanyamura likasa la phangano na kudangira. Ŵati ŵafika pa Mronga wa Yorodani, ŵasofi ŵakanjira mu maji kwambura kwimilira. Maji ghakaŵa ghanandi comene ndiposo ghakendanga mwankhongono comene. Kweni malundi ghawo ghati ghakhwaska waka maji, maji ghakamba kuleka kwenda! Mwee, nawo ni munthondwe! Yehova wakajara maji kunena kwa mronga. Mwantheura, mu mronga mukaŵavya maji!

Ŵasofi awo ŵakayegha likasa la phangano ŵakaluta na kwimilira pakati pa mronga apo pakaŵa pakomira. Kasi waŵawona pa cithuzithuzi apa? Ŵakati ŵimilira pakati pa mronga, Ŵaisrayeli wose ŵakambuka pa malo ghambura maji!

Ŵanthu wose ŵakati ŵayambuka, Yehova wakaphalira Yoswa kuti waphalire ŵanalume ŵankhongono 12 kuti: ‘Lutani apo ŵasofi ŵimilira na likasa la phangano. Mukatore malibwe 12 mukaghaŵike apo mwamugona muhanya wuno. Para ŵana ŵinu ŵazam’mufumbani kunthazi ico malibwe agha ghakung’anamura, muzamuŵaphalira kuti maji ghakaleka kwenda apo likasa la phangano likayambukanga Yorodani. Malibwe agha ghazamumukumbuskani za munthondwe uwu!’ Yoswa wakaŵikaso malibwe 12 pa malo apo ŵasofi ŵakimilira mu mronga.

Paumaliro Yoswa wakaphalira ŵasofi awo ŵakayegha likasa la phangano kuti: ‘Fumanimo mu Yorodani.’ Ŵati ŵafumamo, maji gha mu mronga ghakambaso kwenda.