КӨР ДААН! Изра́ильчилер Иорда́н хемни кежип турар! Ынчаарга хамык суг канчап барганыл? Чылдың бо үезинде черле хөй чаъстаар болгаш, көңгүс каш минут бурунгаар хем эриктеринден үндүр агып чыткан болгай. Ынчалза-даа хамык суг чиде берген! Ынчангаш изра́ильчилер Кызыл далайны кежип турганы-биле дөмей, шак ынчаар хемниң кургаг дүвү-биле кежип турлар! Ынчалза-даа хамык суг кайнаар барганы ол? Билип алыылам.

Изра́ильчилерниң Иорда́н хемни кежер үези кээрге, Иегова Иисус Навинге дараазында сөстерни чонга дамчыдар кылдыр дужааган: ‘Бараалгакчылар дугуржулга-чагыгның хааржаан алгаш, чоннуң мурнунга чоруур ужурлуг. Олар Иорда́нның суунче кириптери билек, суг акпайн баар’.

Ынчаарга бараалгакчылар дугуржулга-чагыгның хааржаан көдүргеш, чоннуң мурнунга ону көдүрүп алган бар чыдыр. Иорда́нга чоокшулап келгеш, бараалгакчылар дораан-на сугже сүзүп кире берген. Хем хөлчок шапкын болгаш ханы. Ынчалза-даа оларның буттары сугга дээптери билек, ол сыыгап эгелээн! Хуулгаазын болу берген! Иегова хемниң бажында агымны хөөлбектеп каапкан болган. Ынчангаш хемниң суу удаваанда соглуп калган!

Бараалгакчылар дугуржулга-чагыгның хааржаа-биле кургап калган хемниң дал ортузунче үнүпкен. Оларны чурукта көрүп тур сен бе? Олар аңаа турда, арткан изра́ильчилер Иорда́нның кургап калган дүвү-биле эртип турар!

Шупту кеже бергенде, Иегова Иисус Навинге 12 шыырак эр кижилерге чугаалаар кылдыр дужааган: ‘Хемде дугуржулга-чагыгның хааржаан туткан бараалгакчыларның чанынче барыңар. Оон 12 дашты алгаш, хонар турлааңарга оларны аппарып салыптыңар. Келир үеде ажы-төлүңер бо кандыг уткалыг даштар чүвел деп айтырар болза, Иегованың дугуржулга-чагыының хааржаан Иорда́нны кежирип турда, хемниң агымы турупкан деп, харыылаар силер. Ол даштар бо хуулгаазынның дугайында сагындырып кээр!’ Иисус ол ышкаш хемниң дүвүнче 12 дашты бараалгакчыларның турган черинче салып каан.

Сөөлүнде барып Иисус дугуржулга-чагыгның хааржаан көдүрүп чоруур бараалгакчыларга чугаалаан: ‘Иорда́ндан үнүп келиңер’. Олар үнүп кээри билек, хемниң унунче суг катап ага берген.