KŨLĨHISA ndomo va Isareli va kasi loku yoka Olui Yordão! Volui mueyuka ovava alua. Koloneke viaco ombela ya kala loku loka calua kuenje olui lueyukile. Pole vokatembo kamue katito ovava a takata! Va Isareli va fetika oku yoka olui posi ya kukuta ndeci va lingile Vokalunga Kakusuka. Pi kua enda ovava aco? Tu konomuisi ulandu waco.

Otembo ya va Isareli yoku yoka Olui Yordão, yeya oku pitila. Omo liaco, Yehova wa vilikiya Yehosua oco a sapuile omanu hati: ‘Ovitunda ovio viambata ocikasia covisila kuenda oku pita kovaso yomanu vosi. Eci olomãi viovitunda vi liatela Volui Yordão, ovava a talama.’

Noke ovitunda via yelula ocikasia covisila kuenje va pita kovaso omanu vosi. Eci ovitunda via pitila Volui Yordão, va liata vovava. Vepuluvi liaco ovava a kala loku yoloka kuenda volui mua longele calua. Pole eci olomãi viavo via liata volui, ovava haico a fetika oku talama. Ca kala ocikomo cimue cinene! Yehova wa kotola ovava konano yolui kuenje vokatembo kamue katito ovava a takata.

Ovitunda vina viambata ocikasia covisila, via wila volui toke vokati kaco. Tala vociluvialuvia cilo ndomo ovo va kasi. Osimbu ovo va talama vokati kolui, va Isareli va fetika oku yoka Olui Yordão posi ya kukuta.

Eci omanu vosi va yoka, Yehova wa vilikiya Yehosua oco a sapuile alume vamue ekũi la vavali hati: ‘Kuendi kovitunda vi kasi locikasia covisila vokati kolui. Nyañuli ovawe ekũi la vavali, kuenje vambati toke oku u kalala vuteke ulo. Koloneke vi yako, eci omãla vene vo puli vati: Ovawe valo a lomboloka nye? Vu va kumbulula hati: Eci tua yoka Olui Yordão locikasia covisila via Yehova, ovava a kotokele. Ovawe alo a kala onjivaluko yocikomo caco.’ Kuenje Yehosua wa kapa ovawe vaco ekũi la vavali kuna kua kala ovitunda locikasia covisila vokati kolui.

Noke Yehosua wa sapuila ovitunda viaco hati: ‘Tundi Volui Yordão.’ Eci va tunda volui, ovava haico a fetika oku lupuka.

Yehosua 3:1-17; 4:1-18.