Vhonani! Vhaisiraele vha khou wela Mulambo wa Yorodane! Fhedzi maḓi a ngafhi? Ngauri mvula nnzhi i a na nga itsho tshifhinga tsha ṅwaha, mulambo wo vha wo ḓalesa mimuniti i si minzhi nga phanḓa. Fhedzi zwino maḓi o ṱuwa oṱhe! Vhaisiraele vha khou wela kha shango ḽo omaho u fana na Lwanzheni Lutswuku! Maḓi oṱhe o yafhi? Kha ri vhone.

Musi hu tshi ḓa tshifhinga tsha uri Vhaisiraele vha wele Mulambo wa Yorodane, khezwi zwe Yehova a ita uri Yoshua a vhudze vhathu: ‘Vhotshifhe vha fanela u dzhia mbulungelo ya mulanga vha tshimbila phanḓa hashu. Musi vha tshi vhea milenzhe yavho kha maḓi a Mulambo wa Yorodane, maḓi a ḓo litsha u elela.’

Vhotshifhe vha hwala mbulungelo ya mulanga phanḓa ha vhathu. Musi vhotshifhe vha tshi ḓa Yorodane, vha kanda maḓi. O vha a tshi khou elela nga maanḓa nahone o tsa. Fhedzi kathihi fhedzi musi milenzhe yavho i tshi kwama maḓi, maḓi a thoma u ima u elela! Ndi vhuṱolo! Thungo ya nṱha Yehova a ita uri maḓi a vhe damu. Nga u ṱavhanya hu si tsha vha na maḓi mulamboni!

Vhotshifhe vho hwalaho mbulungelo ya mulanga vha ya vhukatikati ha mulambo wo omaho. Ni a vha vhona tshifanyisoni? Samusi vho ima henefho, Vhaisiraele vhoṱhe vha wela Mulambo wa Yorodane kha shango ḽo omaho!

Musi vhoṱhe vho wela, Yehova a ri Yoshua a vhudze vhanna vha 12 vha maanḓa: ‘Dzhenani mulamboni ho imaho vhotshifhe vhe na mbulungelo ya mulanga. Dobani matombo a 12, ni a ṱhophe hune noṱhe na yo dzula hone vhusiku. Musi vhana vhanu vha tshi ni vhudzisa tshifhingani tshi ḓaho uri a amba mini, ni vha vhudze uri maḓi o ima u elela musi mbulungelo ya Yehova i tshi wela Yorodane. Matombo a ḓo ni humbudza uvhu vhuṱolo!’ Yoshua a vhea na matombo a 12 he vhotshifhe vha vha vho ima hone mulamboni.

Mafheleloni Yoshua a vhudza vhotshifhe vho hwalaho mbulungelo ya mulanga: ‘Ibvani Yorodane.’ Kathihi fhedzi vha tshi bva, mulambo wa thoma u dovha u elela.

Yoshua 3:1-17; 4:1-18.