Tantara 45

Fitsakan̈a Ten̈aranon’i Jordana

ISRAELITA aby io mitsaka Ten̈aranon’i Jordana! Aia fo basy rano? Asara andra tamy zen̈y, ke an̈abo rano. Tiô fo, ritry ranobe in̈y! Israelita aby io amy zay nitsaka amy tany maiky, karaha tamy Ranomasin̈y Mena in̈y! Lôso aia fo rano jiaby? Alô zahavatsika.

Izikoa fa navy lera hitsakan’Israelita aby io Ten̈aranon’i Jordana, Jehovah nan̈iraka Josoa hivolan̈a tamin’olo: ‘Mpisôron̈o mitaondra fiaran’ny fanekena ambilà mandeha alohatsika. Vitin-drô koa fa tafandia Ten̈aranon’i Jordana, hijanon̈o rano.’

Mpisôron̈o aby in̈y amy zay nibata fiaran’ny fanekena in̈y, baka iô nandeha alohan’olo jiaby. Irô koa fa navy tamy rano tiô amy zay baka, handia rano. Rano io tamy zen̈y nandeha mare, sady lalin̈y. Kanefa, niaraka vitin-drô nikasiky rano, nijanon̈o rano io! Fahagagan̈a zen̈y tan̈y! Jehovah nisakana rano boaka an̈abo. Tsy ela amy zay, naiky ten̈arano in̈y!

Mpisôron̈o aby mitaondra fiaran’ny fanekena in̈y amy zay, nandeha tan̈ivon’ny tany maiky. Hitanao irô amy sary io? Irô nitsangana tiô, ziska Israelita jiaby tafitsaka.

Olo jiaby koa fa tafitsaka, Jehovah nan̈iraka Josoa hikaiky 12 lahy fatatra. Volan̈iny: ‘Mandihana amy tany itsanganan’ny mpisôron̈o aby mitaondra fiaran’ny fanekena arỳ. Mangalà vato 12, atobia amy tany idokoanarô alin̈y ty. Amy zen̈y, amin’afara an̈y, ry zanakanarô koa man̈ontany anarô dikan’ny vato aby io, anarô mitantara amin-drô fa naiky Ten̈aranon’i Jordana, izikoa fa nitsaka tiô fiaran’ny fanekenan’i Jehovah. Vato aby io hampatsiaro anarô fahagagan̈a in̈y!’ Josoa koa nan̈ambela vato 12 tamy tany nitsanganan-drô mpisôron̈o aby io.

Farany amy zay, Josoa nivolan̈a tamin-drô mpisôron̈o nitaondra fiaran’ny fanekena in̈y: ‘Manongà antety amy zay.’ Niaraka irô niala tao, rano nimpody nandeha mare karaha taloha.

Josoa 3:1-17; 4:1-18.