CINSHI calengele ifi ifibumba fya Yeriko ukuwa? Filemoneka kwati balishishemo ibomba ilikalamba. Lelo ilya nshita takwali amabomba nelyo imfuti. Ici na co cali cipesha mano ca kwa Yehova! Natulande pa fyacitike.

Umfwa ifyo Yehova aebele Yoshua. Atile: ‘Iwe na baume bobe abalwa mu nkondo mufwile ukushinguluka umusumba. Mukaleushinguluka umuku umo cila bushiku, pa nshiku 6. Mukasende ne cipao ca cipangano. Bashimapepo 7 bafwile ukuba pa ntanshi balelisha amapenga ilyo muleshinguluka umusumba.

‘Pa bushiku bwalenga 7, mufwile ukushinguluka umusumba imiku 7. Na pa numa mukalishe amapenga pa nshita ntali e lyo bonse mukapunde sana ukupunda kwa bulwi. Ne fibumba fya Yeriko fikawa!’

Yoshua na bantu balicitile ico Yehova alandile. Ilyo baleshinguluka ifibumba, bonse bali fye tondolo. Tapali nangu umo uwalelanda. Ifyo abantu baleumfwa fye, mapenga ayalelila e lyo ne congo ca makasa ya baleshinguluka umusumba. Abalwani ba bantu ba kwa Lesa abali mu Yeriko bafwile balitiinine. Bushe naukamona akatambo akakashika akalepeeleela pe windo? Bushe ili line iwindo, lya kwa nani? Nga fintu ulemona, Rahabu alicitile ifyo bamwebele. Balupwa lwakwe bonse bali mu kati na ena.

Na mu kulekelesha, pa bushiku bwalenga 7, pa numa ya kushinguluka umusumba imiku 7, amapenga yalililile na baume ba bulwi balipundile ne fibumba fyaliwile. Lyena Yoshua atile: ‘Ipayeni umuntu onse mu musumba no kuoca. Moce na fyonse ifyabamo. Musheko fye silfere, golde, umukuba, ne cela, no kuyafibika mu ca kusungilamo ifyuma icaba mu cikuulwa ca kupepelamo Yehova.’

Yoshua aebele inengu shibili ati: ‘Kabiyeni mu ng’anda ya kwa Rahabu, no kumufumya kumo na ba mu ng’anda yakwe.’ Rahabu no lupwa lwakwe balipuswike, nga fintu inengu shamulaile.