VIM LI CAS lub moos Yelikhau tus ntsa loog pob tag lawm? Zoo nkaus li yog hoob pob tawg, tiamsis lub sijhawm ntawd twb tsis tau muaj hoob pob. Kuj tsis tau muaj phom li thiab. Qhov no yog ib qho txujci uas Yehauvas tau ua ntxiv! Cia peb kawm saib ua li cas ho muaj li ntawd.

Yehauvas qhia rau Yausua tias: ‘Koj thiab koj cov tub rog cia li ncig lub moos 6 hnub, 1 hnub ncig 1 lwm. Kwv lub phij xab sib cog lus nrog nej mus. Xya tus pov thawj yuav tsum tshuab lawv tej raj mus ua lub phij xab sib cog lus ntej.

‘Hnub 7 nej yuav tsum ncig lub moos 7 lwm. Tom qab ntawd, tshuab raj kom ntev loo, thiab hais kom txhua tus qw nrov nrov heev. Ces tus ntsa loog yuav pob tag nrho!’

Yausua thiab cov tibneeg ua li Yehauvas hais. Thaum lawv ncig lub moos, txhua tus nyob ntsiag to xwb. Tsis muaj ib tug hais lus li. Tsuas hnov lub suab raj thiab hnov cov tub rog mus kev xwb. Tej zaum lawv cov yeeb ncuab hauv lub moos Yelikhau yuav ntshai kawg li. Koj puas pom txoj hlua liab liab uas dai ntawm lub qhov rais? Lub qhov rais ntawd yog leejtwg lub? Yog Lahaj lub. Lahaj tau ua raws li 2 tug txivneej uas tshuaj tebchaws hais kom nws ua. Tag nrho nws tsev neeg nyob hauv nws lub tsev, thiab lawv nrog nws saib ntsoov tej uas tabtom muaj tshwm sim.

Thaum txog hnub 7, lawv ncig lub moos Yelikhau 7 lwm. Tom qab ntawd, lawv tshuab raj, thiab cov tub rog qw nrov nrov. Thaum lawv ua li ntawd tas, tus ntsa loog txawm pob kiag. Ces Yausua hais tias: ‘Tua txhua tus uas nyob hauv lub moos thiab muab lub moos hlawv pov tseg. Muab ib puas tsav yam hlawv tag nrho. Tseg tej nyiaj, tej kub, tej tooj thiab tej hlau xwb, thiab muab tej ntawd tso hauv Yehauvas lub txhab.’

Yausua hais rau 2 tug txivneej tshuaj tebchaws tias: ‘Mus hauv Lahaj lub tsev thiab coj nws thiab nws tsev neeg tawm los.’ Lahaj thiab nws tsev neeg thiaj dim, ib yam li 2 tug txivneej tshuaj tebchaws tau cog lus rau nws lawm.