LI XNUBʼAAL li tenamit Jerico yook chi tʼaneʼk. Chanchan hiik yook chi bʼaanunk re! Aʼin jun chik li sachbʼachʼoolej kixbʼaanu li Jehobʼa. Qilaq chanru kixbʼaanu.

Li Jehobʼa kixye re laj Josue: ‹Laaʼat ut ebʼ laj puubʼ li wankebʼ aawikʼin teesuti chixjunil li tenamit. Jun sut ajwiʼ chiru li kutan teesuti li tenamit Jerico ut teebʼaanu chiru waqibʼ kutan. Teekʼam xkaaxil li sumwank ut wuqubʼ aj tij teʼxik chiru li kaax aʼin ut yooqebʼ xyaabʼasinkil ebʼ li pur›.

Kixye ajwiʼ: ‹Saʼ xwuq li kutan, wuqubʼ sut teesuti li tenamit. Moko teekanabʼ ta xyaabʼasinkil li pur ut teejap eere chi kaw. Tojaʼ naq xnubʼaal li tenamit ttʼaneʼq!›

Laj Josue ut ebʼ laj Israel keʼxbʼaanu li kixye li Jehobʼa. Naq yookebʼ xsutinkil li tenamit maaʼani kiʼeekʼank. Kaʼajwiʼ xyaabʼ li pur ut roqebʼ naʼeekʼank. Ebʼ laj Jerico yookebʼ tana xiw. Ma nakaawil jun li kaqi kʼaam saʼ li bʼentaan? Aʼan xbʼentaan li rochoch li xRahab. Li xRahab kixbʼaanu li keʼxye li wiibʼ aj Israel. Li xRahab ut li junkabʼal wankebʼ saʼ li ochoch ut yookebʼ rilbʼal li yook chi kʼulmank.

Saʼ xwuq li kutan, naq keʼraqeʼk xsutinkil wuqubʼ sut li tenamit keʼxchʼeʼ li pur, keʼxjap rehebʼ laj puubʼ. Tojaʼ naq li xnubʼaal li tenamit Jerico kitʼaneʼk. Chirix chik aʼan laj Josue kixye: ‹Kamsimaq ebʼ laj Jerico ut teekʼat chixjunil li wank saʼ li tenamit. Abʼan inkʼaʼ teekʼat li plaat, li oor, li kaqi chʼiichʼ ut chixjunil li chʼiichʼ li teetaw. Aʼin tkʼanjelaq saʼ Rochoch li Jehobʼa›.

Laj Josue kixye rehebʼ li wiibʼ aj Israel li keʼwulak chi rilbʼal li tenamit Jerico: ‹Isimaq chaq li xRahab ut li xjunkabʼal›. Joʼkan naq li xRahab ut li xjunkabʼal keʼkoleʼk.