NĨ KĨĨ kĩratũma thingo ici cia Jeriko imomoke? Kũroneka ta igũthĩtwo nĩ mbomu nene. No matukũ-inĩ macio gũtiarĩ na mbomu; o na gũtiarĩ na mĩcinga. Gĩkĩ nĩ kĩama kĩngĩ kĩa Jehova! Reke twĩrute ũrĩa gwekĩkire.

Ta thikĩrĩria ũrĩa Jehova eerire Joshua: ‘Wee na andũ anyu a ita mũthiũrũrũke itũũra. Mũrĩthiũrũrũke o mũthenya riita rĩmwe mĩthenya ĩtandatũ. Oyai ithandũkũ rĩa kĩrĩkanĩro. Athĩnjĩri-Ngai mũgwanja marĩtongorie makĩhuhaga coro.

‘Naguo mũthenya wa mũgwanja mũgathiũrũrũka itũũra rĩu maita mũgwanja. Hĩndĩ ĩo mũhuhe coro na mũgambo mũraya, nao andũ othe makĩanĩrĩre rĩanĩrĩra inene mũno. Nacio thingo iharagane!’

Joshua hamwe na andũ othe magĩĩka o ũrĩa Jehova oigĩte. Rĩrĩa mathiũrũrũkaga, maakirĩte ki. Gũtirĩ o na ũmwe waaririe kiugo. Kĩrĩa kĩaiguĩkanaga no mũgambo wa coro na mũrurumo wa magũrũ. Thũ cia andũ a Ngai cia Jeriko no mũhaka nĩ cietigĩrire mũno. Hihi wahota kuona mũhĩndo ũũrĩa mũtune ũcuurĩtio ndirica-inĩ? Ĩyo nĩ ndirica ya ũ? Ĩĩni, Rahabu eekire o ũrĩa athigani acio erĩ maamwathĩte eke. Maarĩ na famĩlĩ yake yothe gwake nyũmba meroreire.

Mũthia-inĩ, mũthenya wa mũgwanja, maarĩkia gũthiũrũrũka itũũra maita mũgwanja-rĩ, macoro makĩhuhwo, andũ a ita makĩanĩrĩra, nacio thingo ikĩmomoka. Rĩu Joshua akiuga: ‘Ũragai andũ othe thĩinĩ wa itũũra na mũrĩcine. Cinai indo ciothe. Honokiai betha, thahabu, icango na igera, mũciheane mũthithũ-inĩ wa hema ya Jehova.’

Ha ũhoro wa athigani acio erĩ, Joshua akĩmera: ‘Thiĩi mũtonye nyũmba ya Rahabu, mũmũrute oime na nja hamwe na famĩlĩ yake yothe.’ Rĩu Rahabu na famĩlĩ yake magĩkĩhonokio, o ta ũrĩa athigani acio maamwĩrĩire.