KI KA kyalengejile bibumbu bya Yeliko kupona? Kyamweka nobe bomba mukatampe ye wafikijilepo. Bino mu yoya myaka kechi bajinga na mabomba nangwa mata ne. Kyajinga kya kukumya kikwabo kya Yehoba! Twaya tumone byo kyaubiwe.

Akyumvwa Yehoba byo aambijile Yoshua amba: ‘Obewa ne banabalume bonse ba nzhita mukazhokoloke pangye ya muzhi. Mukazhokolokenga muzhi jimo pa juba pa juba pa moba atanu na jimo. Sendai jikwachi ja lulayañano. Bañanga batanu na babiji bakatangileko kulutwe ya jikwachi ne kwimba matolompita abo.

‘Pakuba mu juba ja butanu na bubiji mukazhokolokenga muzhi jitanu na jibiji. Mukembe pa nsengo jiwi jalepa ne kubijika na jiwi jikatampe ja nkondo. Kabiji ne nsakwa ya muzhi ikakunduka panshi laa!’

Yoshua ne bantu baubijile monka mwibambijile Yehoba. Byo bazhokolokelenga, bonse bazhindaminetu nzo. Kafwako nangwa umo waambilepo kyambo ne. Nsengo ne mitutu byo byonkatu byaumvwanyikilenga. Balwanyi ba bantu ba Lesa bajinga mu Yeliko bachiine bingi. Nanchi wamumona lutambo uchila pa kipenze nyi? Kipenze kya kwa ñanyi kye? Ee, Lehaba waubijile monka mwamwambijile bamwendela ntanda babiji. Bonse ba mu kisemi kyanji bajinga mukachi pamo ne aye Lehaba saka batalatu kyaubiwenga.

Kyapeleleko, pa juba ja butanu na bubiji, panyuma ya kuzhokoloka muzhi bimye bitanu na bibiji, baimbile matolompita, ne banabalume ba nkondo babijikile, kabiji nsakwa yakundukile panshi. Kepo Yoshua aambile’mba: ‘Vizhai bonsetu bajinga mu muzhi ne kumusokatu yense lokoto! Shaipotu siliva ne ngolode, ne bijiilo bya mukuba ne bya kapotwe, mwibibike mo balamina bya buneme mu nzubo ya Yehoba.’

Yoshua waambijile bamwendela ntanda babiji amba: ‘Yainga mu nzubo ya kwa Lehaba, na kumulupulamo aye ne ba mu nzubo yanji.’ Lehaba ne ba mu nzubo yanji bebapulwishe, byonkatu byo bamulayile ku boba bamwendela ntanda.