Kembwe yaYeliko
Chihande 46
Kembwe yaYeliko
VINAKULIMBWISA kembwe yaYeliko vika? Chinakusoloka nge hanatulila kapata wamunene. Oloze makumbi aze kavapwile natupatako; kavapwile numba namata akahyako. Echi hichuma chikwavo chakukomwesa chakuli Yehova! Tutalenu muchapwile.
Ivwa omu Yehova anakulweza Yoshuwa ngwenyi: ‘Yako navaka-kwasa jita mujinguluke nganda kana che ndo. Yijingulukenu halikumbi kamwe che ndo, hamakumbi atanu nalimwe. Mbatenu nachikasha chalushiko. Vapilishitu vatanu navavali vakapwe kulutwe lwachikasha nakwimba jimbendo.
‘Halikumbi lyamuchitanu naavali mwatela kujinguluka nganda katanu nakavali. Jino kembenu jimbendo nakutwalaho, kaha vatu vosena vakatambakane mutambi waunene. Kaha kembwe nayikapuzuka!’
Yoshuwa navatu valingile mwambile Yehova. Hakujinguluka vaholele. Nawakutufula lizu pimbi. Shina kaha vivumo vyajimbendo najishindo jamahinji. Vaka-kole javatu jaKalunga muYeliko vatela vachikimine. Walumono lungoji luchila luli munjanena tahi? Njanena yeya vene yize? Eyo, Lahave nalingi muvambile vaze vandoji vavali. Vausoko wenyi vosena vali nenyi mukachi nakutala vinakulingiwa.
Jino, halikumbi lyamuchitanu naavali, hakukumisa kujinguluka nganda katanu nakavali, jimbendo hinajivuma, malunga vaka-jita hinavatambika mutambi, kembwe hikushiuka. Yoshuwa ngwenyi: ‘Jihenu vatu vosena vali munganda nakuyocha. Ochenu vyosena. Kanda namukenyeka palata, ulu, unengu nafweluko, oloze kavihakenu mwakulamina vikumba vyaYehova.’
Yoshuwa hikwamba kuli vaze vandoji vavali ngwenyi: ‘Ingilenu muzuvo yaLahave, mumulovolemo navausoko wenyi vosena.’ Lahave navausoko wenyi vayovokele, ngana muvamushikile vandoji.