¿ALQUʼN in kubʼ tzʼaq qe muro lu? Ik tzeʼnku jun matij bomba ma kubʼ tzʼaq tibʼaj. Toj ambʼil aju mitiʼtaq qe bomba; ax ikx mitiʼqetaq xobʼil qʼaqʼ. ¡A jlu, naq tuʼn tipumal Jehovájo! Qo xnaqʼtzal tiʼj tzeʼn bʼaja jlu.

Qbʼinx aju tzaj tqʼamaʼn Jehová te Josué: ‹Ok kqʼole jun welt kyukʼe tsoldade tiʼjele tnam jun maj toj jun qʼij ajxi tjapun qaq qʼij. Ex iltiʼj tuʼn t-xi kyiʼne kajon kʼubʼel yol kyaj bʼant tiʼj. Iltiʼj tuʼn kykubʼ nej wuq pal twitz kajon kʼubʼl ley ex tuʼn t-xi kyxupin mo tuʼn tok kyqʼajtzaʼn twiʼ tukʼa ẍneʼl.

‹Tujtzun twuqin qʼij wuq maj che qʼole welt tiʼj tnam. Ex kyqʼajtzaʼnktzene nim ambʼil aqeju kach, ex kykyaqile che jawel ẍchʼine tukʼe tkyaqil tqʼajqʼojel kywiʼye. ¡Oktzun che kbʼel xitj tmuro Jericó!›

Bʼant tuʼn Josué ex kyuʼn aj Israel aju tzaj tqʼamaʼn Jehová kye. Tej nchi bʼetteq tiʼjele tnam, kykyaqil mitiʼtaq nchi yolin. Oʼkx tqʼajqʼajel kyqan tukʼe tqʼajqʼojil twiʼ tukʼa rit in qʼajtetoq. E tzaj xobʼle qe ajqʼoj te Jericó tuʼn jlu. ¿Ntlome, moqa ntila, aju aqwil kyaq tiʼj tok ttzi ventan? ¿Alqeju ventan lu? Ikjo, o kubʼ tbʼinchan Rahab aju xi kyqʼmaʼn kabʼe xjal te. In nayontaq Rahab kyukʼe kykyaqil toj tja.

Tojtzun twuqin qʼij, tej oteqxi chi bʼaj bʼet wuq maj tiʼjele tnam, xi kyxupin toj tkach rit, i jaw ẍchʼin qe aj Israel ex e kubʼtzen tzʼaq tmuro Jericó. Xi tqʼmaʼn Josué: ‹Chi kybʼiyonkuye xjal ex kyqʼonke tqʼaqʼal tnam tukʼex tkyaqilju at tuj, oʼkxku saq pwaq, qʼan pwaq, qʼan kʼuxbʼil ex mastl kʼuxbʼil, chi kbʼelex jlu toj tqʼinumabʼil ja xbʼalin›.

Xi tqʼmaʼn Josué kye qejo kabʼe xjal ex tsamaʼn: ‹Kyqʼimetze Rahab kyukʼex kykyaqil toj tja›. E klet qe jlu, ikxix tzaʼnj otaq txi kytziyan qeju kabʼe xjal ex samaʼn.