ÁNNI nga tíbixojensíni xjáo xi kjindai Jericó. Joxi bomba kakanele sʼin matsen. Tonga nga kui nichxin kje tsínjin bomba, kʼoa nikuijinla tjín kicha xi kui bʼétsao. ¡Ijngo choa̱ tsakakó Jeobá! Kataʼyala jókoannile.

Je Jeobá i̱ kitsole Josué: “Ji kʼoa kao chjota kjoajchánli tikʼótinndailao naxinandá. Ñandia tikʼótinndao nga nyaon nyaon kʼoa jaon nichxin kʼoatʼiaon. Chʼao je kaxa jña nya je kjoa xi kisʼendajin. Ñato naʼmi katafitítjonle je kaxa kʼoa katasíkjane nindale.

“Nga je koa̱nñatoni nichxin ñato kʼa tʼetinndailao naxinandá. Kʼoaliti nixa̱njinnilao nga tikjiʼndao je nindano, kʼoa tʼejtao ngatsʼio joni kʼianga sʼejna kjoajchán. ¡Kʼoa je xjáo xi kjindai Jericó kuixojen!”

Je Josué kʼoa kao naxinandá kʼoakisʼin jokitsole Jeobá. Kʼianga kisikʼótinndai je naxinandá, likui ʼya xi kinchja. Tokuikjoan xi kinoʼyale je ninda xi kisikjane kʼoa kao ndsoko. Je chjota kontrale xi ya tsʼe Jericó kitsokjonjin. A tiʼyaní je nʼóní xi kitjensí ya ventana. ʼYá tsʼe ventana xokji. Jaon, tsʼee Rahab, kʼoakisʼin joná kitsole je xi kichokotsenché ʼndele. Ngatsʼi yaniʼyale ya tsakatioʼya, kʼoa kiskotsen jme xi kjima.

Je nichxin xi koanñatoni, ñato kʼa kisikʼotinndaile Jericó, xijekoan, kisikjane nindale, kʼoa tsakʼéjta je chjota kjoajchán, kʼoa kixojen je xjáo xi kjindai Jericó. Josué kitso: “Tikʼaon je chjota kʼoa takao ngayeje naxinandá, tonga tikʼangio je taonchxoa, je taonsiné, je kichaní kʼoa kao xi kicha, kʼoa tsojmi jebi ya satío ya jña tíjna je ndʼianajño”.

Je Josué i̱ kitsole nga jao xi kichokotsenché Jericó: “Chʼasjao ndʼiale je Rahab kʼoa kao ngatsʼi yaniʼyale”. Kitjontjai chjota jebi, jokjoanná kitsole xi kichokotsenché ya ʼndele.