VIKA vi li na ku lundumuna vivumbe via Yeliko? Ngue mbuze va na asako. Vunoni, ku matangua aze ka kua kele vimbuze; cipue mata ka a keleko. Eci ci na pu cikomoueso cikuavo ca Yehova! Tu tale vati viendele.

Yehova ua lekele Yehosua ngueni: ‘Nove na vamala vakua ku lua ndzita, mu ka zenguluka mbonge yose. Mu ka lizengako lumo mu litangua, mu matangua atanu na limo. Mu ka ambata cikasa ca litavasiano. Kaha vasasendote vatanu na vavali va na pande ku ka hita ku lutue oku vasika maluneta.

 ‘Kaha ha litangua lia mu citano na avali mu ka lizenga ku limbo lutano na luvali. Amba vuose, mu ka sika cikuma maluneta, kaha vantu vose va na pande ku ka tambeka mutambi ua ndzita na lizi lia kama. Kaha vivumbe vika lundumuka lia!’

Yehosua na mbunga va lingile muze mua va tumine Yehova. Omo va putukile ku zenguluka vose va holokele kulu. Uahi ua handekele. Kua kele na ku zivika lika maluneta na vi ntsindo via vantu va kele na kuenda. Vitozi va vantu va Njambi va kele Yeliko va vuile mundzundzu ua kama. Ua mono uze mukole ua ku tila uli ha njanena ni? Njanena ya ndzivo yeya ize? Eyo, Lahave na lingi ngue muze mu va mu sikile vaze vandondzi vavali. Va vusoko vueni vose va li hamo neni mu ndzivo.

Mu lia heta litangua lia mu citanu na avali, omo va manene ku zenguluka mbonge lutanu na luvali maluneta ohiele kaha vamala va ndzita va tambekele kaha vivumbe via lundumukile. Kaha Yehosua ua handeka ngueni: ‘Tsihenu muntu uose ali mu mbonge kaha i tsimikenu. Tsimikenu viose. Tambulenu lika palata, na olu, na nkengelezi, na vutale kaha vi hanenu ku vupite vua mbalaka ya Yehova’.

Kaha Yehosua a tuma vaze vandondzi vavali ngueni: ‘Kovelenu mu ndzivo ya Lahave, mu nehenu kuno na vusoko vueni’. Lahave na vusoko vueni va na ovoka ngue muze mu va va sikile vandondzi.