TLAPOUALISTLI 46

Itepamitl Jericó

¿TLEN kichijtok ma uetsi itepamitl Jericó? Moita ken omochi se guerra. Maski amo ijkon opanok. ¡Nin okse milagro tlen Jehová okichi! Ma tikitakan ken opanok.

Xikaki tlen Jehová okilui Josué: ‘Te iuan mosoldados xinejnemikan uan xikyaualokan altepetl. Xikyaualokan sejpa ipan se tonal uan ijkon xikchiuakan ipan chikuase tonalmej. Xikuikakan arca itech tlajtolsenkaualistli. Chikome teopixkamej moneki yaskej iyekapan arca uan moneki ma kipitsakan inkuakojuan.

’Ipan tonal chikome xikyaualokan altepetl chikometipan. Ijkuakon, ma uejkaui xikpitsakan kuakojmej, uan nochtin xitsajtsikan ken ijkuak nanmoteuijtokej. ¡Uan tepamitl uetsis!’.

Josué uan israelitas okichijkej ijkon ken Jehová okijto. Ijkuak okiyaualojtokaj altepetl, amo akaj otlajto. San omokak ijkuak okipitskej kuakojmej uan inmikxiuan ijkuak onejnemiayaj. Akinmej ochantiayaj itech Jericó uan okinkokoliayaj israelitas omomojtijkej. ¿Ueli tikita mekatl chichiltik tlen pilkatok itech ventana? ¿Akin ompa ochantiaya? Kema, Rahab okichi ken okiluijkej ome tlakamej tlen ichtaka otlachiatoj. Uan nochtin ichanejkauan ompa okatkaj ikalijtik, omochixtokaj.

Saiktlami, ipan tonal chikome, satepan okiyaualojkej altepetl chikometipan, okipitskej kuakojmej, otsajtsikej soldados, uan tepamitl ouetski. Josué okijto: ‘Xikinmiktikan tlaltikpaktlakamej uan nochi xikxotlaltikan, san amo itlaj xikchiuilikan oro, plata, cobre uan hierro, pampa non mouikas itech tabernáculo’.

Josué okinmilui ome tlakamej tlen ichtaka otlachiatoj: ‘Xiakan ikalijtik Rahab, uan xikinkixtikan ye uan nochtin ichanejkauan’. Rahab uan ichanejkauan omomakixtijkej ijkon ken okijtojkej ome tlakamej tlen ichtaka otlachiatoj.

Josué 6:1-25.