KO E heigoa ne taute e tau kaupā nei ha Ieriko ke malolo? Tuga kua fai pomu lahi ne lau ai. Ka e nakaila fai pomu ia a lautolu he tau vahā ia; ti nakai fai fana foki a lautolu. Ko e taha mana a ia ha Iehova! O mai la ke fakaako ko e tupu fēfē e mena ia.

Fanogonogo la ke he mena ne tala age e Iehova ki a Iosua. ‘Ko koe mo e tau tagata tau oti haau kia o takai he maaga. O takai i ai taki lagataha he aho ke he ono e aho. Uta e puha he maveheaga mo mutolu. Fitu e ekepoa kua lata ke ō i mua he puha mo e ulo ai e tau pu ha lautolu.’

‘He aho ke fituaki kua lata ia mutolu ke ō takai laga fitu he maaga. Ti uulo fakaloa ai e tau pu, ti kalaga ai e motu oti mo e leo lahi mahaki. To malolo hifo ai e tau kaupa!’

Ne taute e Iosua mo e tau tagata e tau mena ne tala age e Iehova. Magaaho ne ō takai a lautolu, ne nakai lea ai ha tagata. Nakai fai tagata ne to ha kupu. Ko e mena ni ne logona ko e leo he tau pu mo e tau hui ne ō takai. Liga kua matakutaku e tau fī he tau tagata he Atua i Ieriko. Kitia nakai e koe e toua filo kula ne tautau he fakamaama? Ha hai e fakamaama ia? E, ne taute ni e Raava e mena ne tala age he tau tagata toko tokoua. Haia oti e magafaoa haana i loto ne onoono fakalataha mo ia.

Fakahiku ai, he aho ke fituaki, he oti e ō takai lagafitu he maaga, ne uulo e tau pu, kalaga e tau tagata tau, ti malolo ai e tau kaupā. Ti pehē a Iosua: ‘Tamate e tau tagata oti he maaga mo e huhunu ai. Huhunu e tau mena oti. Fakahao ni e tau ario, auro, apa kula mo e lapatoa, ti tuku ai ke he tokaaga koloa he fale ie ha Iehova.’

Ke he tokoua e tagata toko ne pehē a Iosua: ‘Kia ō ke he fale ha Raava, ti tamai a ia mo e magafaoa katoa haana ki fafo.’ Kua fakahao a Raava mo e magafaoa katoa haana, tuga ni ne mavehe age he tau tagata toko ki a ia.