WUAROM kjeiwelt de Stautsmia von Jericho toop? Daut lat soo, aus wan doa eene groote Bomm oppjeknault es. Oba to dee Tiet jeef daut noch kjeene Bommen; daut jeef noch nich mol Flinten. Daut wia wada een Wunda von Jehova! Well wie mol seenen, woo daut kjeem.

Jehova säd to Josua: ‘Go met diene Kjrichsmana sas Doag lank jieda Dach eemol rom de Staut. Nämt uk de Bundeskjist met. Un säwen Priestasch sellen veropp gonen un met de Hieena blosen.

Aun dän säwenden Dach sell jie säwen Mol rom de Staut gonen. Dan sell jie een langet Stoot blosen un aula een grootet Kjrichsjeschrech moaken. Un de Stautsmia woat toopfaulen.’

Josua un daut Volkj deeden, waut Jehova an jesajcht haud. Aus see rom de Staut jinjen, wieren see aula muckstell. Kjeena säd een Wuat. Bloos daut blosen von de Hieena un de Mana äare Schräd wieren to hieren. Äare Fiend en Jericho motten secha Angst jehaut haben. Kaust du dän rooden Baunt seenen, waut dort utem Fensta ruthenjt? Wäms Hus es daut? Daut es Rahab äat. See haud jedonen, waut de Spionen ar jesajcht hauden. Äare gaunze Famielje wia bie ar em Hus. Dee oobachten aula, waut passieed.

Aum säwenden Dach, aus de Israeliten ieescht toom säwende Mol rom de Staut jegonen wieren, blosden see met äare Hieena un muaken een grootet Kjrichsjeschrech. Un doamet kjeiweld de Stautsmia von Jericho toop. Dan säd Josua: ‘Moakt aulemaun en de Staut doot un vebrent aules. Nämt bloos daut Selwa, Golt, Koppa un Iesa met un brinjt daut no de Schaza von Jehova sien Aunbädungszelt.’

To de twee Spionen säd Josua: ‘Got no Rahab äa Hus un brinjt ar un äare gaunze Famielje doa rut.’ Rahab un äare Famielje worden jerat, krakjt soo aus de Spionen ar daut vesproaken hauden.