46-нҗы хекая

Эриханың диварлары

ЭРИХАНЫҢ диварлары нәме үчин йыкылярка? Онуң үстүне улы бомба гачан ялы. Йөне ол вагтлар бомба, хатда түпеңем ёкды. Бу Ехованың ене-де бир гудраты! Гел, мунуң нәдип боланыны билели.

Ехованың Ешува берен буйругыны диңле: «Эсгерлер билен шәхериң дашындан, гүнде бир гезек, алты гүнләп айланың. Яныңыз билен әхт сандыгыны гөтериң. Сандыгың өңүнден еди руханы сурнай чалып йөресин.

Единҗи гүн шәхериң дашындан еди гезек айланың. Соңра сурнайы узак вагтлап чалың. Хер бириңиз батлы гыгырың. Шонда диварлар дүйбүне ченли йыкылар!»

Ешув хем-де халк Ехованың буйругыны айдышы ялы ерине етирйәр. Йөрүш вагты үмсүмликди. Хич кимден сес чыкмаяр. Диңе сурнайың ве йөрүшиң сеси эшидилйәр. Худайың Эрихадакы душманлары горкан болсалар герек. Әпишгеден асылып дуран гызыл йүпи гөрйәңми? Бу кимиң әпишгесикә? Хава, Рахав ичалыларың айдышы ялы-да этди. Ол бүтин машгаласы билен билеликде бу болян затлара сын эдйәр.

Ине-де единҗи гүн етип гелди. Халк сөвеше чагырян сурнай сесини чалып, шәхериң дашындан еди гезек айланяр. Диварлар йыкыляр. Шонда Ешув: «Шәхериң яшайҗыларыны өлдүриң, шәхери болса отлаң. Бар зады отлаң. Диңе күмши, алтыны, миси хем-де демри галдырып, Ехованың чадырының хазынасына элтиң» дийип буюрды.

Ешув ики ичала: «Рахавың өйүне барың-да, оны бүтин машгаласы билен чыкарың» дийди. Ичалыларың сөз берши ялы, Рахав бүтин машгаласы билен дири галды.

Ешув 6:1—25.