KO E HĀ ‘okú ne ‘ai ‘a e ngaahi ‘ā ko ‘eni ‘o Sielikō ke holó? ‘Oku hangē na‘e lī ai ha fo‘i pomú. Ka ‘i he ngaahi ‘aho ko iá na‘e ‘ikai ha ngaahi pomu ia ai; pea na‘e ‘ikai foki ke ‘i ai ha ngaahi me‘afana ia. Ko ha mana mo ‘eni ‘e taha ‘a Sihova! Tau ako ke ‘ilo pe na‘e anga-fēfē ‘ene hokó.

Fanongo ki he me‘a na‘e tala ‘e Sihova kia Siōsiuá: ‘⁠Ko koe mo ho‘o kau tangata taú te mou laka takatakai ‘i he koló. Laka takai tu‘o taha ‘i he ‘aho, ‘o fai pehē ‘i he ‘aho ‘e ono. Fua ‘a e puha ‘o e fuakavá ‘o mou ō mo ia. Ko e kau taula‘eiki ‘e toko fitu te nau laka ‘i mu‘a pea ifi ‘enau ngaahi me‘alea.

‘ ‘I he ‘aho hono fitú te mou laka takai tu‘o fitu ‘i he koló. Pea ifi faka‘aulolongo ‘a e ngaahi me‘aleá, mo kaila le‘o lahi ‘a e kakai kotoa pē. Pea ‘e holo ki lalo ‘a e ngaahi ‘ā!’

Na‘e fai ‘e Siōsiua mo e kakaí ‘a e me‘a na‘e tala ‘e Sihová. ‘I he‘enau laká na‘e fakalongolongo ‘a e tokotaha kotoa pē. Na‘e ‘ikai ke lea ha taha. Ko e me‘a pē na‘e ongoná ko e le‘o ‘o e ngaahi me‘aleá mo e laka ‘a e va‘é. ‘Oku pau pē na‘e ilifia ‘a e ngaahi fili ‘o e kakai ‘a e ‘Otuá ‘i Sielikō. ‘Okú ke sio ki he afo kulokula ‘oku tautau ‘i he matapā sio‘atá? Ko e matapā sio‘ata ia ‘o hai? ‘Io, na‘e fai ‘e Lēhapi ‘a e me‘a na‘e tala ange ‘e he ongo sipaí ke ne faí. Ko e kotoa hono fāmilí kau ai mo ia ‘oku nau ‘i loto ‘o mamata mei ai.

Faka‘osí, ‘i he ‘aho hono fitú, ‘i he hili ‘enau laka takai tu‘o fitu ‘i he koló, na‘e ifi ‘a e ngaahi me‘aleá, pea na‘e kaila ‘a e kau tangata taú, pea na‘e holo ‘a e ngaahi ‘ā. Pea toki pehē ‘e Siōsiua: ‘⁠Tāmate‘i ‘a e tokotaha kotoa pē ‘i he koló pea tutu ia. Tutu ‘a e me‘a kotoa pē. Fakahaofi pē ‘a e siliva, koula, kopa mo e ukamea, pea ‘ave ia ki he tuku‘anga koloa ‘o e tēniti ‘o Sihová.’

Na‘e pehē ‘e Siōsiua ki he ongo sipaí: ‘⁠Mo ‘alu ki he fale ‘o Lēhapí, ‘o ‘omai ia mo hono fāmilí ki tu‘a.’ Na‘e hao mo‘ui ‘a Lēhapi mo hono fāmilí, ‘o hangē pē ko ia na‘e tala‘ofa ‘e he ongo sipaí kiate iá.