¿BIN la yakʼ jinuk koel te tsʼajkʼetik yuʼun Jericó? Jich yilel te tʼom jun mukʼul bomba tey-ae. Jaʼukmeto ta kʼajkʼal-abi maʼyuk bombaetik, sok maʼyuk mukʼul tujkʼetik-a. ¡Jaʼ yan milagro te la spas te Jehová! Yame kiltik bael te bin utʼil kʼot ta pasele.

Aʼiya awaʼiy stojol te bin albot yuʼun Jehová te Josué: Te jaʼat sok te winiketik yuʼun guerra yame abeentayik ta sjoyobal te lume. Yame ajoyobtayik jun buelta ta jujun kʼajkʼal te lume, jichme ya apasulanik ta wakeb kʼajkʼal. Ichʼaik bael te skaxaul te chapbil kʼope. Juktul sacerdoteetik yame skʼan xnailajik bael ta stojol te skaxaul te chapbil kʼope sok yame yokʼesinik te xulubiletike.

Ta sjukebal kʼajkʼal jukeb buelta yame xbeenex ta sjoyobal te lume. Tey-abi yame xjalajatik ta yokʼesinel te xulubiletike, sok tulanme ya x-awunatik ta apisilik ta swenta guerra. ¡Jichme ya xjin koel te tsʼajkʼetike!

Te Josué sok te lume la spasik te bin albotik yuʼun te Jehová: Te kʼalal yakalik ta beel-ae, spisil chʼabeniknax. Te binax ya xchiknaj ta aʼiyele jaʼ te yokʼesinel te xulubiletike soknix te bitʼil yakalik ta beele. Xiwikniwan yuʼun te skontratakik te ayik ta Jericó. ¿Yabal ata ta ilel te tsajal chʼajan te jokʼol ta ventanae? ¿Machʼa yuʼun te ventanae? Jich la spas te Rahab te bitʼil albot yuʼun te chaʼtul jtsajtaywanejetike. Spisil te jayeb machʼatik ay yuʼun te Rahab ayik ta yutil na, sok yakalik ta yilel te bin yak ta kʼoel ta pasele.

Tey-abi ta sjukebal kʼajkʼal te kʼalal laj yoʼtanik ta sbeentayel ta sjoyobal jukeb buelta te lume, la yokʼesinik te xulubiletike, awunik te winiketik yuʼun guerra, jich jin koel te tsʼajkʼetike. Te Josué la yal: Milaik te ants winiketik sok chikʼaik te lume sok spisil te bintik ay tey-ae, jaʼnax te plata, te oro, te cobre sok te hierro jaʼme yuʼun te yawil kʼulejalil ta Nailpakʼ templo.

Jich albotik yuʼun Josué te chaʼtul jtsajtaywanejetike: Lokʼesaik tal te Rahab sok spisil te machʼatik ay yuʼune. Kolik jilel ta spisilik, jichnix te bitʼil la yalik jilel ta jamal te jtsajtaywanejetike.