NYE ca kupula ovimbaka evi vio Yeriko? Ovimbaka evi vi kasi ndu okuti via kupuiwa latenda anene. Pole kotembo yaco ka kua kaile atenda ndaño ovota. Yehova eye wa linga ocikomo caco. Tu konomuisi ndomo ca lingiwa.

Kũlĩhisa eci Yehova a sapuila Yehosua. Eye wa popia hati: ‘Ene vosi walume vakuavita, ñuali olupale onjanja yimosi veteke. Eci oco vu linga oloneke epandu. Ambati ocikasia covisila. Ovitunda epanduvali vi pite kovaso yocikasia covisila loku sika anguena avo.

‘Keteke liepanduvali ñuali olupale olonjanja epanduvali. Noke siki anguena kuenda kaluki londaka yovita. Kuenje ovimbaka vi kupuka.’

Yehosua kuenda omanu va linga ovina viosi Yehova a tuma. Osimbu va kala loku ñuala olupale, lomue wa vangula ondaka yimue. Kua kala lika oku yevala onjuvungo yanguena kuenda yolomãi. Ovanyali vomanu va Suku volupale luo Yeriko va fetika oku kuata usumba. Ove hẽ o lete ukolo ukusuka u kasi ndeti ponjanela? Onjanela yaco yelie? Ocili okuti, Rahava wa linga ovina viosi olondavululi vio sapuilile. Epata liaye lia kala vokati konjo oku lavulula kumosi laye.

Keteke liepanduvali noke lioku ñuala olupale olonjanja epanduvali, va Isareli va sika anguena. Alume va kuavita va kaluka, kuenje ovimbaka via kupuka. Noke Yehosua wa popia hati: ‘Pondi omanu vosi va kasi volupale. Va yoki londalu. Yoki ovina viosi. Opalata lulu, lovikuata viosipi levi viutale, vi eciwa kovokuasi ombalaka ya Yehova.’

Yehosua wa sapuila olondavululi vimue vivali hati: ‘Kuendi konjo ya Rahava, u neni kumue lepata liaye.’ Rahava kumue lepata liaye va popeliwa ndeci olondavululi via likuminyile kokuaye.

Yehosua 6:1-25.