Nganea 46: Mbondo dza Yeriko
Idzi mbondo dza Yeriko dzi khou wiswa nga mini? Zwi tou nga dzo rwiwa nga bomo khulu. Fhedzi maḓuvhani ayo vho vha vha si na dzibomo: vho vha vha si na na zwigidi. Ndi vhuṅwe vhuṱolo ha Yehova! Kha ri gude uri zwo itea hani.
![Mbondo dza Yeriko dzo wa](https://assetsnffrgf-a.akamaihd.net/assets/l/my/my_VE/46.jpg)
Thetshelesani zwe Yehova a vhudza Yoshua: Iwe na vhanna vhau vha u lwa ni tshimbile ni tshi mona muḓi. Ni u mone luthihi ḓuvha ḽiṅwe na ḽiṅwe maḓuvha a rathi. Ni tshimbile na mbulungelo ya mulanga. Vhotshifhe vha sumbe vha tshimbile phanḓa hayo vha tshi lidza dziphalaphala.
‘Nga ḓuvha ḽa vhusumbe ni fanela u mona muḓi kasumbe. Zwenezwo ni lidzese dziphalaphala, noṱhe ni ṱavhe mukosi wa nndwa. Zwenezwo mbondo dzi ḓo wela fhasi!’
Yoshua na vhathu vha ita zwe Yehova a amba. Musi vha tshi tshimbila, vhoṱhe vho vha vho fhumula. Hu si na a ambaho ipfi. Zwe zwa pfala wo vha u mubvumo wa dziphalaphala na milenzhe i tshimbilaho. Iḽa thambo tswuku yo nembelelaho fasiṱereni ni a i vhona? Ee, Rahaba o vha o ita zwe ṱholi mbili dza mu vhudza. Vha muṱa wawe vho vha vhe ngomu vha tshi khou sedza nae.
![Yoshua](https://assetsnffrgf-a.akamaihd.net/assets/l/my/my_VE/46a.jpg)
Mafheleloni, nga ḓuvha ḽa vhusumbe, vho no mona muḓi kasumbe, phalaphala dza lila, vhanna vha nndwa vha ṱavha mukosi, nahone mbondo dza wa. Zwenezwo Yoshua a ri: ‘Vhulahani vhoṱhe muḓini ni u fhise. Fhisani zwoṱhe. Vhulungani fhedzi maseṱha, musuku, tsimbitswuku na tsimbi, ni zwi ise denndeni ya Yehova.’
Kha ṱholi mbili, Yoshua a ri: ‘Dzhenani nḓuni ya Rahaba, ni mu bvise na muṱa wawe woṱhe.’ Rahaba na muṱa wawe vho vha vho tshidzwa, samusi ṱholi dzo vha dzo mu fulufhedzisa.
Yoshua 6:1-25.
Mbudziso
- Yehova o vhudza vhanna vha u lwa na vhotshifhe uri vha ite mini maḓuvha a rathi?
- Vhenevho vhanna vha fanela u ita mini nga ḓuvha ḽa vhusumbe?
- Samusi ni tshi khou zwi vhona kha tshifanyiso, hu khou itea mini kha mbondo dza Yeriko?
- Ndi ngani thambo tswuku i tshi khou nembelela fasiṱereni?
- Yoshua o vhudza vhanna vha u lwa uri vha ite mini nga vhathu na muḓi, fhedzi hu pfi mini nga maseṱha, musuku, tsimbitswuku, na tsimbi?
- Ṱholi mbili dzo vhudzwa uri dzi ite mini?
Mbudziso dzo engedzeaho
- Vhalani Yoshua 6:1-25.
U mona ha Vhaisiraele Yeriko nga ḓuvha ḽa vhusumbe hu fana hani na mushumo wa u huwelela wa Ṱhanzi dza Yehova maḓuvhani ano a vhufhelo? (Yosh. 6:15, 16; Yes. 60:22; Mat. 24:14; 1 Vha-Kor. 9:16)
Vhuporofita ho ṅwalwaho kha Yoshua 6:26 ho ḓadzea hani miṅwahani ya 500 yo fhiraho, nahone zwenezwi zwi ri funza mini nga ha Ipfi ḽa Yehova? (1 Dzikh. 16:34; Yes. 55:11)