ANA cici cacikutendekasya mapupa ga Yeliko kugwa? Yikuwoneka mpela kuti mabomba gawulisye mapupago. Nambo moŵa gelego ŵandu nganakola mabomba. Nganakolasoni wuti. Cili cakusimonjesya cine ca Yehofa! Kwende tulijiganye mwayatendecele.

Apikane Yehofa yakumsalila Yoswa: ‘Mmwejo ni acalume ŵakuputa ngondo mjende mwakusungulila msinda. Mjendeje mwakusungulila msindawo lisiku lililyose kampepe kwa masiku 6. Pakusungulila mnyakule libokosi lya cilangano. Ŵambopesi 7 ajendeje paujo pa libokosilyo ali mgomba malipenga.

‘Pa lisiku lya 7 akusosekwa kwenda mwakusungulila msindawo kakwana ka 7, Soni agombeje mapengago mwakwendelecela mnope, soni jwalijose agumile mpela kagumile ka ngondo jekulungwa. Mapupa gosopego gacigwa pasi!’

Yoswa ni ŵanduwo akutenda yaŵasalile Yehofa. Pakwenda kusungulila, jwalijose ngakutenda masegwe. Pangali jwakuŵeceta liloŵe lililyose. Masegwe gagakupikanika gali ga mapenga ni kwenda kwa sajo sya ŵandu. Acimmagongo ŵa ŵandu ŵa Mlungu mu Yeliko komboleka ŵakwete woga. Ana akuluwona lukonji lwecejewu lwaluli paliwindopo? Ana liwindolyo lili lya nduni? Lahabu atesile yaŵamsalile ŵakusonda ŵaŵili ŵala. Liŵasa lyakwe lyosope ni jwalakwe ali mesope mkatimo.

Kumbesi kwakwe, pa lisiku lya 7, ali ajesile mwakusungulila msinda kakwana ka 7, akulisya malipenga, acalume ŵakuputa ngondo akugumila, kaneko yipupa yikugwa pasi. Kaneko Yoswa akwasalila ŵandu kuti: ‘Awulaje jwalijose mumsinda, soni awujoce. Ajoce cilicose. Asunjepe maganga ga silifa, golidi, nakaliwu ni cisyano, nikuyipeleka mwakusunjila yindu mu citenti ca Yehofa.’

Kwa ŵakusonda ŵaŵili ŵala, Yoswa akuŵeceta kuti: ‘Ajawule m’nyumba ja Lahabu, nikumkoposya jwalakwe ni liŵasa lyakwe lyosope.’ Lahabu ni liŵasa lyakwe akulupwice, mpela muŵaŵecetele ŵakusonda ŵala kwa jwalakwe.