¡ADKINTUNGE tüfachi wentru petu rüngali ñi ponwi tolto ruka mu! Kiñe tutelu takun, kiñe triran milla (oro), ka kiñeke moneda plata. Kom tüfa entufi Jeriko mew. Welu ¿chumngeafulu kom tüfachi falinke chemkün entuel Jeriko mew? ¿Tukulpaniefimi?

Mülerkefuy ñi apümngeal kom ti falinke chemkün, welu müley ñi wülngeal Jewba ñi fütra tolto ruka ñi trawülechi falin chi yewün ñi ellkaleam, ti milla ka plata, tüfa ñi femfalfel. Fey mu tüfachi pu che feyentulafingün ta Jewba. Weñeñmafigün Jewba ñi ngen-ngelu. Tüfachi wentru Akan pingey, ka feychi trawülelu fey ñi reñma (pu che) engün. Peayiñ chem dungu rupay.

Dew weñelu Akan tüfachi chemkün, Josue werküy kiñeke wentru ñi kewayafiel (weychayafiel) Ay pingechi waria. Welu wewngerkey engün. Kiñeke lay, kakelu lefmawi engün. Josue rume weñangküy. Pochongnakümi ñi ange mapu mew, llellipufi Jewba ka feypifi: ‘¿Chumngelu (chemu) eluñmaymi ñi rupayal tüfachi dungu?’

Jewba llowdunguy: ‘¡Witrapürange! Israel yafkay. Mülefuy ñi elungeal Ngünechen ñi fütra tolto ruka, ka kakelu apümngeal. Weñey kiñe tutelu takün, ellkalfingün ka feypilayngün. Apümnofilmün feyti takun ka feyti nülu kom tüfachi chemkün, kümelkawlayayiñ.’ Jewba feypifi ta Josue ñi pengelafiel iney (iñi) ngen chi weda wentru.

Fey mu Josue trawüli itrokom pu che, Jewba pengelfi ti weda wentru, Akan. Ka Akan feypi: ‘Yafkan may. Pefiñ kiñe tutelu takun, chi triran milla ka pu moneda plata mu. Rume ayüfiñ tüfachi chemkün, yeñmutun. Peafimün kom rünganküley tañi ponwi tolto ruka mu.’

Pepulu engu ti chemkün ka yelelngey Josue, fey feypifi Akan: ‘¿Chumngelu wedalkamuyiñ? ¡Fewla Jewba wedalkayaymu!’ Feymu kom chi pu che kuratufi Akan ka kom ñi pu che. Lalu wüla engün, fentekünufingün. ¿Chumngechi pengeleyiñmew tüfa chumkawnorume mülelay ñi yeñmayafiel kakelu che ñi chemkün?

Fey wüla Israel ka wiño amuy ñi kewayafiel (weychayafiel) Ay pingechi waria mew. Fey wüla Jewba kellufi ñi pu che, ka wewi engün chi awkan.