¡KUNSA aka jaqix carpap manqhar allintaski! Mä suma isimpi, qurimpi, ukat qullqinakamp allintaski. Jericó markat apsunitayna. Ukampis ¿kamachasiñapänsa ukanakampixa? ¿Amttati?

Taqi kunas phichantasiñapänwa, ukat quris qullqis yupaychañ utar Jehová Diosatak apasiñapänwa. Ukhamax Diosaruw jan istʼapkänti. Diosatakïki ukwa apaqasipki. Acán sataw aka jaqixa, ukat mayninakax familiapawa. Ukat kamachataynas uk uñjañäni.

Acán tatax lunthatasïn uka qhipatxa, Josué tataw Hai markampi nuwasir soldadonakap khitäna. Ukampis atipayasinipxataynawa. Yaqhipanakax jiwapxänwa, yaqhanakasti chhuktanxapxarakïnwa. Josué tatax wal llakisïna. Ajanup uraqir puriyasaw Jehová Diosar akham sasa mayisïna: ‘¿Kunatsa atipjayasipxta?’ sasa.

Jehová Diosax akham sänwa: ‘¡Saytʼma! Israel markax jachʼa juchaniwa. Phichkatañatakïkäna jan ukax yupaychañ utar apañatakïkäna ukanakwa utar apasipxi. Mä suma iswa lunthatapxi ukampis janiw arsupkiti. Uka lunthataru ukat uka isiru jan chhaqtayapkätaxa janiw bendicipkämati’ sasa. Nayaw khitis uka jan wali jaqixa uk uñachtʼayäma sasaw Jehová Diosax säna.

Ukhamasti, markpacharuw Josué tatax jawsthapiyäna, ukat Acán sat jan wali jaqiruw Jehová Diosax qhanstayäna. Acanax akham sänwa: ‘Juchachastwa. Suma isimpi, qurimpi qullqinakamp uñjasax sintpunwa munayäta ukat ukanak utajar apasta. Carpaj manqharuw ukanak allintta, ukankaskiwa’ sasa.

Carpap manqhat katjanisinxa Josué tataruw churapxi, ukat jupax akham siw Acanaruxa: ‘¿Kunatarak jumasti aka jan walinak lurapxistasti? ¡Jichhasti Jehová Diosaw jan walir puriyarakïtamxa!’ sasa. Acanampi familiapampiruw taqi jaqinakax qalamp kʼupjapxäna jiwayañkama. Janiw mayninakat kuns apaqañasäkiti, ¿janit aka sarnaqäwix uk yatichkistu?