TALA lunga au yize anavumbika mu mbalaka yenyi! Chimwe chikuto chipema, ni chipinji cha oru nawa ni mbongo ja prata. Iye kayanda mu mbonge ya Yeriku. Mba alioze yika te chatamba kulinga ni yuma ya ku Yeriku? Yena uneuluka?

Yuma yacho kanakayamba ngwo te chatamba kuyonona, alioze oru ni prata te chatamba kuyihana ku upite wa mu tabernakulu ya Yehova. Atu wano kehuka shimbi ya Zambi. Ayo keya yuma yambala ya Zambi. Lunga yono jina lienyi Akane, waze ali noo kali asoko jenyi. Tutalenu yika yinakapwako.

Muze Akane te heya yuma yacho, Yoshua yatuma amwe malunga hanga ase jita ni mbonge ya Ayi. Alioze ayo yaakumba kuli Akwa Ayi. Amwe kanakaashaha, waze anakasaloho ni mwono yachina. Yoshua yevwa yinyengo yinji. Iye yafulamana hashi ni kulemba kuli Yehova ngwenyi: ‘Mumu liaka yena wecha yuma yino yipwe kuli yetwe?’

Yehova yakumbulula ngwenyi: ‘Katuka! Izalele kavulumuna. Ayo kanda yimwe yuma yize te chatamba kuyonona nawa ni yize te chatamba kuyihana ku tabernakulu ya Yehova. Ayo keya chimwe chikuto chipema nawa kachisweka. Yami chichi kunuwahisa nyi kunwonwene yuma yacho, nawa ni atu waze ayiyanga.’ Yehova yamba ngwo makasolwela Yoshua lunga wacho mupi.

Kashika Yoshua yakungulula atu eswe hamuwika, mba Yehova yatongola lunga wacho mupi, mwe Akane. Akane yamba ngwenyi: ‘Yami hinavulumuna. Yami namonanga chimwe chikuto chipema, ni chipinji cha oru hamwe ni mbongo ja prata. Yami yinguyizanga chinji kashika nayandanga. Yenwe munuhasa kuyiwana yakuvumbika mu mbalaka yami.’

Muze awanyine yuma yacho yayitwala kuli Yoshua, iye yamba kuli Akane ngwenyi: ‘Mumu liaka watukokela lamba?’ Haliapwila Yehova makumwesa lamba!’ Hohene atu eswe yaputuka kwasa mawe kuli Akane ni kuli asoko jenyi ndo ha kufwa cho. Chino chinalumbunuka ngwo yetwe chatutambile kwanda yuma yambala, nyi ngwami?

Mba kulutwe lia yino yuma, A-Izalele yaya nawa ni kwasa jita ni Akwa Ayi. Ha chisuho chino Yehova yakwasa atu jenyi, hi A-Izalele yakumba Akwa Ayi.