HI MIPA hi a thlam chung ah zeidah vawlei ah a phum zoh tuah hmanh u! Aa dawh ngai mi puan zunkhat, sui tlangkhat le ngun tlawmpal an si. Mah hna cu Jeriko khua i a lak mi an si. Sihmanhsehlaw Jeriko khua i lak mi hna cu zeitin tuah awk dah an si? Nan hngal ti maw?

Hrawh dih awk an si. Sui le ngun belte cu Jehovah thlam chawva chiahnak ah pek awk an si. Cucaah hi mi hna nih hin Pathian nawl an ngaih lo a si. Pathian ta a si mi kha an fir. Hi mipa a min cu Akhan a si, amah he a um mi hna cu amah innchungkhar mi an si. Zeidah a cang zoh hmanh u sih.

Akhan nih hi thil hna a fir hnu ah, Joshua nih mi a cheu kha Ai khua doh awk ah a thlah hna. Sihmanhsehlaw annih cu an va sung. A cheu cu an thah hna i, adang cu an zam dih. Joshua cu a ngaih a chia ngaingai. Vawlei ah a hmai i hmuah chih in a bawk i Jehovah sin ah thla a cam: ‘Zeicah kan cung ah hi thil cu na tlunter?’ a ti.

Jehovah nih: ‘Tho tuah! Israel cu a sual cang. Hrawh hnga ding mi thil le Jehovah thlam chawva chiahnak i pek hnga ding mi thil cheukhat kha an lak cang. Aa dawh ngai mi puan zunkhat kha an fir i a thli tein an thuh. Hi thil hna le a latupa kha na hrawh hna hlan ahcun thluachuah kan pe hna lai lo,’ tiah a leh. Cun cu miṭhalo pa cu aho a si kha kan hmuhsak lai tiah Joshua kha a ti fawn.

Cucaah Joshua nih mi vialte kha hmunkhat ah a pumh dih hna i, Jehovah nih miṭhalopa Akhan cu a langhter. Akhan nih: ‘Ka sual cang. Aa dawh ngai mi puan zunkhat le, sui tlang le ngun tlawmpal cu ka hmuh hna. Ka duh tuk hna caah ka lak hna. Ka thlam chung ah vawlei tang i ka phum kha nan hmuh lai,’ tiah a ti.

Cu thil hna cu an hmuh i Joshua sin ah an ratpi tik ah, Joshua nih Akhan cu: ‘Zeicah kan cung ah harnak na chuahter? Atu cu Jehovah nih nangmah cung ah harnak a chuahter ve cang lai!’ a ti. Khi tik ah mi vialte nih Akhan le a innchungkhar mi hna cu thi lak in lung in an cheh dih hna. Mah nihcun kan ta a si lo mi thil paoh cu kan lak awk a si lo ti a langhter lo maw?

Cuhnu ah Israel mi hna cu Ai khua doh awk ah an kal ṭhan. Cutik ahcun Jehovah nih a mi hna kha a bawmh hna i, an ral cu an tei.