GETE ki sa zonm pe antere dan son latant! En zoli rob, e en bar annor ek en pe larzan. I’n pran tousala dan lavil Zeriko. Me ki zot ti sipoze fer avek sa bann keksoz an Zeriko? Eski ou mazinen?

Zot ti’n sipoze ganny detrir, e lor ek larzan ti sipoze ganny donnen avek trezor tabernak Zeova. Alor sa bann dimoun ti dezobei Bondye. Zot ti vol sa ki pour Bondye. Sa zonm ti apel Akan, e sa bann ki avek li i manm son fanmiy. Annou vwar ki ti arive?

Apre ki Akan ti vol sa bann keksoz, Zozye ti anvoy serten zonm pour lager kont lavil Ai. Me zot ti perdi laviktwar. Serten ti ganny touye, e larestan ti taye. Zozye ti vreman tris. I ti dormi ater e bes son latet ater e priy Zeova: ‘Akoz ou’n les sa arive avek nou?’

Zeova ti reponn: ‘Leve! Izrael in fer pese. Zot in pran serten keksoz ki ti’n sipoze ganny detrir oubyen ganny donnen avek trezor tabernak Zeova. Zot in vol en zoli rob e gard li sekre. Mon pa pou beni ou ziska ki ou detrir sa bann keksoz, e sa enn ki’n pran sa bann keksoz.’ Zeova ti dir ki i pou montre Zozye lekel sa move zonm.

Alor Zozye ti rasanble tou dimoun, e Zeova ti swazir Akan konman sa move zonm. Akan ti dir: ‘Mon’n fer pese. Mon’n vwar en zoli rob, e sa bar lor ek sa bann larzan. Mon ti vreman anvi zot ki mon’n pran zot. Ou pou trouv zot antere dan mon latant.’

Kan sa bann keksoz ti ganny trouve e ganny anmennen kot Zozye, alor Zozye ti dir avek Akan: ‘Akoz ou’n anmenn problenm lo nou? Aprezan Zeova pou anmenn problenm lo ou!’ E tou dimoun ti konmans anvoy ros lo Akan ek son fanmiy ziska zot mor. Eski sa pa i montre nou ki nou pa devret pran okenn keksoz ki pa pour nou?

Apre sa Izrael ti al lager ankor kont Ai. Sa fwa si Zeova ti ed son pep, e zot ti ranport laviktwar.