GOEËNE cahu hna juetrën hnene la thupëtresij hnine la uma maano i angeic! Iheetr ka mingöming, me itre sine gool, me sileva. Hnei angeic hna xom qaa Ieriko. Ngo hetre hna amekötine kö göne lo itre trenga mo ne Ieriko? Mekune hi nyipunie lo nyine troa kuca?

Ame lo hna amekötin, troa dreuthe trije itre ej, ngo ame la gool, me sileva, troa amë hnine la trengene mo hnine la uma ne hetra i Iehova. Haawe matre ame cahu itre atr, itre ka thaa drengethenge Akötresieti angatr. Hnei angatr hna xomi mon la itre trenge nyi Akötresie. Akana cahu ketre, nge hna ce xöl me angeic, hnene la itre sin la lapa i angeic. Tro së a ce wang la pengön, matre traqa pi la ewekë celë.

Thupene hë lo hna ënö hnei Akana, hnei Iosua hna upe la itre sooc troa lepe la itre atren la traon e Ai. Hane hi lai kola ngaa angatr ngöne la isi. Hna humuthi itre xan, nge itre xan a hna kötre mel pë hë. Matre hace catr la hni Iosua. Angeic a meköle qe ipië kowe la hnadro, me thithi koi Iehova, me hape: ‘Pine nemen matre Cilieti a nue huni troa akötr tune la?’

Iehova a sa ka hape: ‘Mejë jë! Ngazo hë la thiina i angetre Isaraela. Hna xom la itre ewekë nyine troa dreuthe trij, maine pena troa amë hnine la trengene mo ngöne la uma ne hetra i Iehova. Hnei angatr hna ënö fe la ketre iheetr ka mingöming, nge hnei angatr hna juetrën. Tro kö ni elanyi a amanathithi epun, e ase hë epuni dreuthe trij ej, me humuthe fe la atrekënö.’ Iehova a qaja ka hape, tro Nyidrëti a amaman koi Iosua lai atrekënö.

Haawe, Iosua a icasikeune jë la nöj, nge Iehova a köjane pi la atr ka ngazo, ene Akana. Matre öni Akana jë hi: ‘Nyipici ngazo la thiinang. Hnenge hna öhn lai iheetr ka mingöming, me lue hadredre lao sekele sileva, me hnepe gole ka fifitre lao sekel. Piin pala ha ni itre ej, matre eni a xome jë itre ej. Itre ej e kohilo hnenge hna kelem, hnine la uma maano i eni.’

Nge öhne hë la itre ewekë hna ënö, ame hna xome itre eje koi Iosua, nge nyidrëti a qaja koi Akana ka hape: ‘Hna uë eö a akötrë hun? Tro Iehova a akötrë eö ngöne la drai celë!’ Ame hnei angetre Isaraela asë hna tranyi Akana me hnepe lapa i angeic hnei etë, uti hë la meci angatr. Thupëne kö së, thaa tro kö së a xome la itre ifekë nyin?

Thupene hë lai, hnei Isaraela hna tro hmaca troa isi me angetre Ai. Ene pe nue pi Iehova la nöje i Nyidrë troa thapa la isi.