Erunga mu Israel
EHUNGI 47
Erunga mu Israel
TARA oviṋa omurumendu ngwi mbi ma pwike mondanda ye! Ombanda yokombanda ombwa notjindimbu tjongoldo noutupa tjiva wosilveri. Eye we vi isa kotjihuro tjaJeriko. Nungwari oviṋa mu Jeriko aavi sokutjitwa vi? Ove mo zemburuka?
Ovyo aavi sokuyandekwa, nu ongoldo nosilveri aavi sokuyandjwa kotjipwikiro tjovihuze vyondanda yaJehova. Okutja ovandu mba kave puratenene ku Jehova. Owo va vakere oviṋa vyaJehova. Ena romurumendu oAkan, nu imbo mbu ve ri puna ye oveṱunḓu re. Indjeye tu tare kutja mape tjitwa tjike.
Kombunda yaAkan tja za nokuvaka oviṋa mbi, Josua wa tuma tjiva vovarumendu okukarwisa otjihuro Ai. Nungwari owo va taarwa motjirwa. Tjiva va zepwa, nu otjihupe tja tupuka. Josua wa hihamwa omutima tjinene. Eye wa wa onḓurumika na kumbu ku Jehova: ‘Ove hapo wa yandjerera tjike otjiṋa hi tji tjitwe?’
Jehova we mu zira: ‘Sekama! Ovaisrael va tura ondjo. Owo va toora tjiva vyoviṋa mbyaave sokuyandeka poo mbyaavi sokuyandjwa kondanda yaJehova. Owo va vaka ombanda yokombanda ombwa nu ave i horeke. Ami hi nakumusera ondaya nga tji mwe i nyanyaura namu zepa ingwi ngwa toora oviṋa mbi.’ Jehova wa tja ma urikire Josua kutja omurumendu omurunde ngwi owaṋi.
Okutja Josua wa woronganisa otjiwaṋa atjihe pamwe, nu Jehova wa urika omurumendu omurunde Akan. Akan wa tja: ‘Ami mba tura ondjo. Ami mba muna ombanda yokombanda ombwa, notjindimbu tjogoldo noutupa wosilveri. Ami ee vi vanga tjinene nga tji mbe vi toora. Mamu ke vi vaza avya horekwa moukoto wondanda yandje.’
Indu oviṋa mbi tji vya munikwa nu avi etwa ku Josua, eye wa tja ku Akan: ‘Okutjavi tji we tu etere oumba otja imbwi? Jehova nambano wina ma eta oumba kove!’ Okuzambo otjiwaṋa atjihe tja zepa Akan nomawe puna eṱunḓu re arihe. Ihi katji nakuturaisira kutja ngaa tu roro okutoora oviṋa mbi vi he ri ovyetu are?
Okuzambo Ovaisrael va ya okukarwa kuna otjihuro Ai rukwao. Otjikando hi Jehova wa vatera otjiwaṋa tje, nowo va taara otjirwa.
