MA NAKAANAW kʼaru yook xmuqbʼal li winq aʼin saʼ li rochoch? Yook xkʼeebʼal rubʼel chʼochʼ jun li chaabʼil tʼikr, li oor ut li plaat. Li winq aʼin kirisi chaq li kʼaʼaq re ru saʼ li tenamit Jerico. Ma jultik aawe kʼaru kixye laj Josue naq teʼxbʼaanu rikʼin chixjunil aʼin?

Laj Josue kixye naq teʼxkʼat chixjunil, abʼan li oor ut li plaat teʼxkʼam saʼ Rochoch li Jehobʼa. Ebʼ li poyanam aʼin keʼxqʼet Raatin li Yos, xbʼaan naq keʼelqʼak. Li winq aʼin, aʼan laj Acan ut wank rochbʼeen li xjunkabʼal. Qilaq kʼaru chik kikʼulmank.

Ak kiʼelqʼak chaq laj Acan naq laj Josue kixtaqla jun chʼuut aj Israel chi yalok rikʼinebʼ laj Hai. Abʼan ebʼ laj Israel inkʼaʼ keʼelk chiʼus, naabʼalebʼ keʼkamk ut wankebʼ keʼelelik. Kʼajoʼ naq kirahoʼk saʼ xchʼool laj Josue joʼkan naq kixhupubʼ ribʼ ut kixye re li Jehobʼa: ‹Kʼaʼut xaakanabʼ naq tqakʼul li rahilal aʼin!›

Tojaʼ naq li Jehobʼa kixye re laj Josue: ‹Waklin! Ebʼ laj Israel xeʼmaakobʼk chiwu. Keʼyeheʼk re naq teʼxkʼat malaj teʼxkʼam saʼ li wochoch li kʼaʼaq re ru. Keʼrelqʼa jun chaabʼil tʼikr ut inkʼaʼ keʼxye. Inkʼaʼ texwosobʼtesi, wi inkʼaʼ teekʼat li tʼikr ut teekamsi laj elqʼ›. Li Jehobʼa kixye naq tixkʼut chiru laj Josue ani kiʼelqʼak.

Naq laj Josue kixchʼutubʼebʼ laj Israel, li Jehobʼa kixkʼut chiruhebʼ naq laj elqʼ aʼan laj Acan. Tojaʼ naq laj Acan kixye: ‹Xinmaakobʼk. Xwil naq chʼinaʼus li tʼikr, wank li oor ut li plaat. Kʼajoʼ naq xwulak chiwu joʼkan xinkʼam! Chixjunil aʼin taataw saʼ xyi li wochoch aran xinmuq›.

Naq ebʼ laj Israel keʼxkʼam chaq re laj Josue li kʼaʼaq re ru aʼin, laj Josue kixye re laj Acan: ‹Kʼaʼut naq xooʼaakʼe saʼ rahilal? Anaqwan taatoj saʼ ruqʼ li Jehobʼa!› Joʼkan naq ebʼ laj Israel keʼxkʼe chi pek laj Acan ut li xjunkabʼal toj reetal naq keʼkamsiik. Aʼin naxkʼut chiqu naq moko us ta xchapbʼal li maawaʼ qe.

Chirix chik aʼan, ebʼ laj Israel kohebʼ wiʼ chik chi yalok rikʼinebʼ laj Hai. Anaqwan keʼelk chiʼus xbʼaan naq li Jehobʼa kitenqʼank rehebʼ.