BAKALA yai ya beno kemona awa, kebumba na ntoto ya nzo-tenta na yandi lele ya kitoko, ndambu ya wolo mpi mbongo ya yandi mebaka na bima yina bau kutaka na mbanza Yeriko. Kansi, inki bau fwete sala na bima yina kele na Yeriko? Keti beno kezaba dyaka?

Bau fwete kufwa bima yonso, kaka mbongo, wolo, bibende fwete tulama na kibumbilu ya tabernacle ya Jéhovah. Bantu yai ya kifwanisu kemonisa mekolama na Nzambi. Bau meyiba bima ya Nzambi. Zina ya bakala kele Akana mpi bantu yankaka kele bantu ya dibuta na yandi.

Na nima ya kuyiba bima yai, Josué tindaka bantu na yandi na kubotula bwala Aï. Bau nungaka ve. Bau fwaka bankaka, mpi bayina kubikalaka kutinaka. Na ntantu yonso, Josué tulaka luse na ntoto mpi yandi sambilaka Jéhovah: ‘Sambu na nki nge mebika mambu ya mutindu yai kubwila beto?’

Jéhovah kuvutudilaka yandi nde: ‘Telama! Israele mesala masumu. Bau mebaka bima yina yau lombaka nde beno fwa yau to beno tula yau na tabernacle ya Jéhovah. Bau meyiba lele ya kitoko mpi bau mebumba yo. Mono tasakumuna beno kaka kana beno fwa yau mpi kufwa muyibi ya bima yina.’ Na nima Jéhovah tubaka nde yandi tatungulula muyibi yina.

Na ntangu yina, Josué bingaka bantu mpi Jéhovah monisaka Akana. Akana ndimaka nde: ‘Mono mesala disumu. Mono monaka lele mosi ya kitoko, ndambu ya wolo mpi bibende ya mbongo. Mono kuwaka nzala na yau mingi: mono bakaka yau. Beno tamona yau ya kubumba na ntoto, na nzo-tenta na mono.’

Na nima ya bau natilaka yandi bima yina, Josué zabisaka Akana nde: ‘Sambu na nki nge mekotisa beto na bampasi? Jéhovah takotisa nge na bampasi bubu yai!’ Mpi bantu yonso fwaka Akana mpi dibuta na yandi: bau fwaka bau na matadi. Sambu na yau, beto fwete kudikeba na mpila nde beto baka ve bima yina kele ve ya beto.

Na nima ya mambu yina, Israele kwendaka kunwana dyaka na bantu ya Aï. Na mbala yai, Jéhovah kunungisaka kikanda na yandi.