Mwiji Muli vaIsalele
Chihande 47
Mwiji Muli vaIsalele
TALA vyuma anakuvumbika ou lunga mumbalaka yenyi! Kochi yamwaza, naulu navihanda vyapalata. Navimbate munganda yaYeliko. Jino vyuma vyamuYeliko vatelele kachi kuvilinga ngachilihi? Nawanuka tahi?
Vatelele kuvyenyeka, kaha ulu napalata vatelele kuvihana kuze kwakulamina vikumba vyamutavanaku yaYehova. Ngocho ava vatu kavamwivwililile Kalungako. Vanevi vyuma vyaKalunga. Ou lunga ikiye Akane, vaze ali navo vaka-tanga yenyi. Tutalenu ovyo navisolokaho.
Hakulinga Akane hanevi lyehi, Yoshuwa hikutuma malunga vamwe kuya nakwasa jita nanganda yaAi. Oloze hikuvaveta mujita. Vamwe vanavajihi, vanasaleho hikuchina. Yoshuwa mwalinyenga chikuma. Hikulimbila chameso hamavu nakulomba kuli Yehova ngwenyi: ‘Mwomwo ika unetavisa chuma kana chitusolokele?’
Yehova ngwenyi: ‘Katuka! vaIsalele vanavulumuna. Vanambate vyuma vatelanga kwenyeka chipwe kuhana kutavanaku yaYehova. Vanevi kochi yamwaza nakuyivumbika. Kangweshi kumikisulako, kuvanga chuma kana muchinongese namutu uze nachimbate.’ Yehova alwezele Yoshuwa nge mwamusolwela mutu kanou wamupi.
Yoshuwa hikukungulula vatu vosena, kaha Yehova hikwandaho lunga wamupi, Akane. Akane ngwenyi: ‘Ngwavulumuna. Ngwamonanga kochi yamwaza, naulu navihanda vyapalata. Ngwavizanganga chikuma kaha hinanguvyanda. Namuviwana ngwavivumbika mumbalaka yami.’
Omu vanaviwane nakuvineha kuli Yoshuwa, hikumwamba Akane ngwenyi: ‘Unatuyanjishile ika? Yehova mwakumwesa makava likumbi lyalelo!’ Haze vene vatu vosena vamujihile Akane natanga yenyi namalolwa. Kutala kacheshi nakutukanda nge katwatela kumbatanga vyuma vyambalako nyi?
Kufumaho vaIsalele hikuya cheka nakulwa jita kuAi. Yehova jino himwavakafwa vatu jenyi, kaha jita vayihashile.