Ikombi muIsarela
MPANJI 47
Ikombi muIsarela
TALAÑA yuma yinakuvumbikayi iwu iyala mwitenti dindi! Nkanji yayiwahi, chishima chawuru nimali asiliva. Wayisendeli mumusumba waYeriku. Indi dinu, chumanyi chadi kwilawu nayuma yamuYeriku? Wunakwanuka?
Yateleli kuyikisañana, hakwila wuru nisiliva yateleli kuyihana kuchikasha chakuhembela mali kutabanaka yaYehova. Dichi awantu anadikañi naNzambi. Aneyi yuma yaNzambi. Ijina daniwu iyala diyi Akani, dichi ana adiyi nawu hichisaka chindi. Tutalenu chichamwekeni.
Hanyima yakwila Akani neyi dehi iyi yuma, Yoshuwa watemesheli antu kuya nakulwa namusumba waAyi. Ilaña ayishindili kunjita. Amakwawu ayijahili, dichi asheli atemukili. Yoshuwa hakuneña nankashi. Hakunoñama chamesu indi hamaseki nakulomba kudi Yehova nindi: ‘Muloñadi chiwunetejeli ichi kutumwekena?’
Yehova hakwakula nindi: ‘Imanaku! Isarela navulumuni. Anasendi yuma yatelela kujilumuna hela kuyihana kutabanaka yaYehova. Eyili nkanji yayiwahi nakuyisweka. Hinukuyikiswilaku chiña tuhu muyikisañani hamu namuntu wunasendi iyi yuma.’ Yehova hakuhosha nindi wukumulejayi Yoshuwa iwu muntu watama.
Dichi Yoshuwa hakupompesha antu ejima hamu, Yehova hakusakulahu muntu watama Akani. Akani hakuhosha nindi: ‘Navulumuni. Namweni nkanji yayiwahi, nichishima chawuru nimali asiliva. Nayifwilili nankashi dichi hinikuyinona. Mukuyiwana nayivumbiki mukachi ketenti dami.’
Chelili iyi yuma anayiwani dehi hiyakuyileta kudi Yoshuwa, hakuhosha naAkani nindi: ‘Muloñadi chiwunaleteli kukala hadetu? Ichi dinu Yehova wukuleta kukala hadeyi!’ Hohenohu antu ejima amwasili Akani nichisaka chindi malola ninochafwiliwu. Ichi komana hichinakumwekesha nawu hitwatela kunona yuma yinabuli kwikala yetuku?
Hanyima yanichi Isarela wayili cheñi nakulwa naAyi. Iyi mpinji Yehova hakukwasha antu jindi nawa hiyakushinda muyina njita.
