Israelpi juk suwa
47 yachachiy
Israelpi juk suwa
¡QHAWARIY imatachus chay runa pakachkasqanta! Juk kʼachitu pʼachata, qurita, phatata ima, pakachkan. Kaytaqa Jericomanta urqhurqa. ¿Yuyarinkichu imatachus Jericopi kasqanwan ruwananku karqa?
Tukuy imata ruphachinanku karqa. Quriqa, phataqa Jehovap toldonpaq kanan karqa. Kay runastaq mana Diosta kasukuchkankuchu. Diospa kasqanta suwakuchkanku. Kay runaqa Achán sutikun, paywan kaqkunataq ayllun kanku. Qhawarina imatachus ruwarqanku.
Achán suwasqanmanta qhipamanqa, Josué juk qututa Hai llaqtawan maqanakunankupaq kacharqa. Chaypitaq israelitasqa atipachikuspa wañurqanku, puchuqkunataq ayqirqanku. Kayqa Josueta mayta phutichirqa. Pampaman uyanta churaspa Jehovamanta mañakurqa: ‘¿Imaraykutaq kaykuna kananta saqinki?’, nispa.
Jehovataq kutichin: ‘¡Sayariy! Israel juchachakun. Imachus phirikunan karqa chayta japʼiykakapunku; juk kʼacha pʼachata suwakunku, manataq willankuchu. Mana qamkunawan kasaqchu, chay pʼachata, chay suwata ima chinkachinaykichikkama’, nispa. Jehovaqa Josueman pichus chay saqra runa kasqanta nirqa.
Josué tukuy llaqtata tantarqa, Jehovataq Achán chay suwa runa kasqanta rikuchirqa. Achán nirqa: ‘Ñuqa juchallikuni. Chay kʼachitu pʼachata, qurita, phatata ima rikuspa, manchayta munapayarqani, chayrayku japʼikapurqani. Toldoypi pʼampasqata tarinkichik’, nispa.
Suwakusqanta urqhuytawan Josueman apamunku, Paytaq Achanta nirqa: ‘¿Imaraykutaq kay tukuy llakiykunata apamuwaykuri? ¡Kunanqa Jehová qammanñataq tukuy kay llakiykunata apamusunqa!’, nispa. Chaymanta rumiwan chʼanqaspa Achanta aylluntawan wañuchinku. ¿Manachu kay, mana jaykʼaq suwakunanchikta yachachiwanchik?
Chanta Israel Hai llaqtawan watiqmanta maqanakuq lluqsirqa. Jehovataq atipananpaq yanaparqa, jinamanta paykuna atiparqanku.
