¡CHAWILAMPEʼ ri tijan kumuq ri jun achi pa rachoch! Are jun jeʼlikalaj (tzʼuʼy) atzʼyaq, xuqujeʼ jun chʼaqap qʼan pwäq rukʼ jumulaj saq pwäq. Wariʼ xukʼam lo pa ri tinamit Jericó. Tekʼuriʼ ¿su rajawaxik xbʼan che ri jastaq (o kos) rech Jericó? ¿La kpe pa ajolom?

Are rajawaxik che xsach uwäch ronojel, tekʼuriʼ ri qʼan pwäq rukʼ ri saq pwäq kkʼam bʼi pa ri tabernáculo rech ri Jehová. Tekʼuriʼ ri winaq xkenimaj ta ri Ajawaxel. Xkelaqʼaj che ri Ajawaxel. Wajun achi ubʼiʼ Acán, ri e kʼo rukʼ e jujun chike ri ufamilia. Chqilampeʼ su xbʼantajik.

Chiʼ ri Acán relaqʼan chik ri täq jastaq, Josué xeʼutaq bʼi jujun täq achijabʼ pa chʼoj kukʼ ri tinamit Hai. Tekʼuriʼ xechʼakan täj. Jujun chike, xekamik, ri täq nikʼaj chik xeʼanmajik. Sibʼalaj xbʼison ri Josué rumal wariʼ. Are xubʼij wariʼ pa chʼawem che Jehová: ‹¿Suche xayaʼo che xbʼan wariʼ?›

Jehová xubʼij wariʼ: ‹¡Chatwaʼlijoq! Xa xubʼan umak ri Israel. Xkekʼam täq jastaq, o kos, che rajawaxik che ksachisax uwäch o kyaʼ pa ri tabernáculo. Xelaqʼax jun jeʼlikalaj atzʼyaq tekʼuriʼ kʼot xkebʼij. Kinya ta tewchibʼäl chiwe we kisachisaj ta uwäch ri atzʼyaq xuqujeʼ ri winaq jachin xelaqʼan wariʼ›. Jehová xubʼij che Josué che kukʼut chuwäch jachin laʼ ri itzel achi.

Rumal laʼ ri Josué xeʼumolij ronojel ri tinamit, tekʼuriʼ Jehová xuya ukʼutik jachin laʼ ri itzel achi, are ri Acán. Acán xubʼij wariʼ: ‹Xinbʼan numak. Xwil jun jeʼlikalaj atzʼyaq, xuqujeʼ jun chʼaqap qʼan pwäq, jumulaj saq pwäq. Sibʼalaj utz xwil wariʼ rumal laʼ xinkʼam bʼik. Kixkunik kiriq ronojel, numuqun chupam ri wachoch›.

Chiʼ xkeriq wariʼ xkekʼam lo che Josué, tekʼuriʼ Josué xubʼij wariʼ che Acán: ‹Awumal at ojkʼo pa kʼäx, ¡kimik Jehová kubʼan kʼäx chawe!› Tekʼuriʼ ronojel ri winaq xkekamsaj ri Acán xuqujeʼ ri ufamilia rukʼ abʼaj. Wariʼ kukʼut chaqe che utz täj che kqakʼam bʼi jastaq, o kos, che qech täj.

Tekʼuriʼ Israel xebʼe chi pa chʼoj rukʼ Hai. Kimik Jehová xeʼutoʼ ri utinimit, rumal waʼ xechʼakanik.