¡QAWAY chay runapa karpanpi pampasqanta! Kuyayllapaq capata, qorita hinaspa qollqetapas pampachkan. Chaytaqa Jerico llaqtamanta aparamun. Ichaqa, ¿imatam rurananku karqa Jerico llaqtapa kaqninkunawan? ¿Yuyachkankichu?

Puchukachinankum karqa, hinaspa qoritawan qollqetaqa Jehová Diospa karpanpi tesoronman apananku karqa. Chaynaqa, kay runakunaqa Jehová Diospa nisqantam mana kasukurqakuchu. Jehová Diospaq rakisqa kaqkunatam suwakurunku. Chay runapa sutinmi Acan, hinaspa paywan kaqkunaqa familianpa wakillanmi. Qawasunchikyá imataq pasarqa.

Chayta Acan runa suwakurusqan qepataqa Josueymi kacharqa soldadokunata Hai llaqtata atacanankupaq. Hinaptinmi vencerachikamurqaku. Wakinninmi wañururqaku, wakinñataqmi lluptikurqaku. Chaywanmi Josueyqa llakikururqa. Qonqoranpa pampaman kumuykuspa Jehová Diosta mañakurqa kaynata: ‘¿Imanasqataq kaynata saqeruwankiku?’ nispa.

Jehová Diosñataqmi nirqa: ‘¡Hatariy! Israel runakunaqa huchallikurunkum. Hapikurunku chinkachinapaq kaqkunamanta hinaspa ñoqapaq rakisqa kaqkunatapas. Kuyayllapaq capata suwakuruspam llullakurunku. Manañam yanapasqaykichikchu chay capata chaynataq suwakuqtapas chinkachinaykichikkama’ nispa. Jehová Diosmi Josueyman nin chay suwakuq runata reqsichinanpaq.

Chaymi Josueyqa llapallan runata huñururqa, hinaptinmi Jehová Diosqa akllarqa Acan sutiyoq suwakuq runata. Chaymi Acanñataq nirqa: ‘Huchallikurunim. Rikururqani kuyayllapaq capata, qollqetapas chaynataq qoritapas. Chaykunata kuyaruspaymi apakurqani. Llapallantam tarinkichik karpaypa chawpin allpa ukupi pampasqata’ nispa.

Chaykunata tariruspanku Josueyman aparamuptinku, payqa Acan sutiyoq runata nirqa: ‘¿Imanasqataq kay desgraciata apamuwarqankiku? Jehová Diosyá qanmanpas kunan punchaw desgraciata apamusunki’ nispa. Hinaptinmi llapallan runakuna rumiwan choqaparurqaku Acan runa familiantin wañunankukama. ¿Manachu kayqa yachachiwanchik imapas ñoqanchikpa mana kasqanta mana apakunanchikpaq?

Chaymanta Israelpa mirayninkuna yapatawan Hai llaqtapa contranpi peleanankupaq rirqaku. Hinaptinmi Jehová Diosqa llaqtanta yanaparqa, chaymi paykunaqa vencerqaku.