YANG’ANANI cinafikira mamuna uyu m’nsasa mwace! Nguwo yakubalika, phindi ya ndalama na mikuruzadu ingasi ya siliva. Iye apikwata ku nzinda wa Yeriko. Kodi ndi ninji pikhafunika kucitwa na pinthu pya m’Yeriko? Kodi musakumbuka?

Ipyo pikhafunika kufudzwa, na ndalama na siliva pikhafunika kuperekwa ku cakukoyera mpfuma m’tabernakulu ya Yahova. Natenepa anthu awa hadabvera Mulungu tayu. Iwo aba pinthu pya Mulungu. Dzina ya mamuna uyu ndi Akani, na ale ali na iye asacita khundu ya banjace. Tendeni tione pidacitika.

Mudamala Akani kuba pinthu pyenepi, Yobzwa atuma amuna angasi kuti akamenyane na nzinda wa Ai. Mbwenye iwo akundwa ku nkhondo. Anango aphiwa, na adasala athawa. Yobzwa atsukwala kakamwe. Iye agona na mphambamimba mbaphembera kwa Yahova: ‘Kodi thangwi yanji mwasiya pyenepi kuticitikira?’

Yahova atawira: ‘Lamuka! Israyeli adawa. Iwo akwata pinthu pinango pyakuti pikhafunika kufudzwa peno kuperekwa ku tabernakulu ya Yahova. Iwo aba nguwo yakubalika mbaibisa. Ine nkhabe dzakupasani nkhombo mpaka kuifudza, na ule adakwata pinthu pyenepi.’ Yahova alonga kuti mbadadzapangiza Yobzwa kuti mbani mamuna unoyu wakuipa.

Natenepa Yobzwa agumanyiza mbumba yonsene, na Yahova apambulisa mamuna wakuipa, Akani. Akani alonga: ‘Ndadawa. Ndaona nguwo yakubalika, phindi ya ndalama na mikuruzadu ya siliva. Ndikhapifuna kakamwe natenepa ndapikwata. Munadzapigumana pyafikirwa nkati mwa nsasa wanga.’

Mudagumanwa pinthu pyenepi mbipibwereswa kwa Yobzwa, iye alonga kwa Akani: ‘Thangwi yanji watibweresera nyatwa? Cincino Yahova anadzakubweresera nyatwa!’ Natenepa anthu onsene apha Akani na banjace mwa kuaponyera miyala. Kodi pyenepi nkhabe kutionesa kuti nee tisafunika kukwata pinthu pyakuti si pyathu tayu?

Buluka penepo Israyeli aenda pontho kamenyana na Ai. Paulendo uno Yahova aphedza mbumba yace, mbiwina nkhondo.