ASE ubuke kutsi lendvodza ifihlani lapha ethendeni layo. Yingubo lenhle, nelucetu legolide kanye netinhlavu tesiliva. Letintfo ititsetse edolobheni laseJerikho. Kepha kwakufanele kwentiweni ngaletintfo taseJerikho? Usakhumbula?

Kwakufanele tishiswe, kodvwa igolide nesiliva kona kunikelwe ethendeni laJehova lekukhontela. Labantfu abamlalelanga Nkulunkulu, ngoba beba tintfo takhe. Lendvodza ligama layo ngu-Akhani futsi unalabanye bemndeni wakhe. Ase sibone kutsi kwentekani.

Ngemuva kwekutsi Akhani sekebe letintfo, Joshuwa wakhipha emadvodza kutsi ayolwa nebase-Ayi. Kodvwa ema-Israyeli ehlulwa kuleyomphi, lamanye abulawa, kantsi lamanye abaleka. Weva buhlungu kakhulu Joshuwa, waze walala phasi ngebuso bakhe wathandaza kuJehova watsi: ‘Ukuvumeleleni loku kutsi kwenteke kitsi?’

Jehova waphendvula watsi: ‘Sukuma! Baka-Israyeli bonile. Batsetse letinye tetintfo lobekufanele tishiswe letinye tato tinikelwe endlini yami. Bebe ingubo lenhle bayifihla. Angeke nginibusise nize nitishise letintfo, naloyo lotitsetse nimbulale.’ Jehova watsi utamkhombisa Joshuwa lendvodza leyebe letitfo.

Joshuwa wabutsela sonkhe sive ndzawonye, Jehova yena wabese uyayiveta lendvodza lembi lengu-Akhani. Akhani watsi: ‘Ngonile. Ngatsi nangibuka ngabona ingubo lenhle kanye netihlavu tesiliva nelucetu lwegolide. Ngatihawukela ngase ngiyatitsatsa. Nitatikhandza ekhatsi ethendeni lami lapho ngatimbela khona.’

Tatfolwa letitfo taletfwa kuJoshuwa watsi kuye: ‘Usiletseleleni lenkinga? Jehova utawehlisela imbhubhiso kuwe.’ Ngalesosikhatsi onkhe ema-Israyeli agcoba Akhani kanye nemndeni wakhe ngematje baze bafa. Akusikhombisi yini loku kutsi akukalungi kutsatsa tintfo letingasito tetfu?

Ngemva kwesikhatsi ema-Israyeli aphindze ahamba ayolwa nebase-Ayi. Jehova wawasita abehlula.