47-нҗи хекая

Ысрайылдакы огры

БУ АДАМЫҢ чадырында гизләп дуран задына серет! Ол овадан эгин-эшик, гуйма алтын, бирнәче күмүш теңңе гизлейәр. Олары Эрихадан алды. Йөне Эрихадан алнан затлары нәме этмелиди? Ядыңдамы?

Олары отламалыды, алтыны хем-де күмши болса Ехованың чадырының хазынасына элтмелиди. Диймек, бу адамлар Худая гулак асмадылар. Олар Худая дегишли зады огурладылар. Бу адамың ады Ахан, янындакылар болса онуң машгаласы. Инди, нәме боларка? Гел, билели.

Бу адам огрулык эденден соң, Ешув бирнәче адамы Гай шәхерине сөвеше иберйәр. Эмма олар сөвешде еңилйәрлер. Оларың бирнәчеси өлдүрилйәр, галаны болса гачяр. Ешув гаты гынаняр. Ол ере йүзин йыкылып, Ехова: «Сен нәме үчин бу затлара ёл бердиң?» дийип дога эдйәр.

Ехова җогап берип: «Тур, Ысрайыл гүнә этди. Олар отланмалы хем-де Ехованың чадырына берилмели зады өзүне алдылар. Овадан эгин-эшиги огурлап гизледилер. Бу затлары ве оны алан адамы ёк этмесеңиз, мен сизе пата бермерин» диййәр. Ехова бу адамың кимдигини гөркезмәге Ешува сөз берйәр.

Ешув бүтин халкы йыгнанда, Ехова Ахан атлы эрбет адамы гөркезйәр. Ахан: «Мен гүнә этдим. Мен овадан эгин-эшик, гуйма алтын ве күмүш теңңе гөрдүм. Бу затлар маңа җуда ярансоң, мен олары алдым. Олары чадырда гизледим» дийип, боюн аляр.

Бу затлары тапып Ешува гетирип беренлеринде, ол Ахана: «Сен нәме үчин бизиң башымыза бела гетирдиң? Муны эдениң үчин Ехова саңа гөз гөркезер!» диййәр. Бу сөзлерден соң, халк Аханы ве онуң машгаласыны дашлап өлдүрйәр. Бу вака кишиниң задыны хич хачан алмалы дәлдигини гөркезмейәрми нәме?

Мундан соң, Ысрайыл ене-де Гай шәхерине сөвеше гидйәр. Бу сапар Ехова халкына көмек эдйәр. Олар сөвешде еңиш газаняр.

Ешув 7:1—26; 8:1—29.