Makani 47: Mubbi mu Isilayeli
LANGA muntu ooyu ncavwumbila mutente lyakwe! Uvwumbila cisani cibotu, alimwi acikoto cangolida azyibeela-beela zyansiliva. Wazyibweza mumunzi wa Jeliko. Pele ino ncinzi ceelede kucitwa kuzintu zyakabwezyegwa mu Jeliko? Hena ulayeeya?
Zyakeelede kunyonyoonwa, pesi insiliva angolida zyakeelede kutolwa kuciyobwedo cacikombelo ca Jehova. Aboobo bantu aaba tiibamulemeka Leza. Babba zintu zya Leza. Izina lyamuntu ooyu ngu Akani alimwi abaabo mbocili limwi mbamukwasyi wakwe. Atubone cicitika.
Mbwaamanina buyo Akani kubba zintu eezyi, Josyuwa watuma bantu kwaakulwana munzi wa Ayi. Pele bazundwa munkondo. Bamwi bajaigwa, pele bamwi baccija. Josyuwa wausa kapati! Woona ansi cakuvwuntama akupaila kuli Jehova wati: ‘Nkaambo nzi ncowalekela cintu eeci kutucitikila?’
Jehova waingula wati: ‘Nyamuka! Isilayeli wabisya. Babweza zintu zyakeelede kunyonyoonwa naa kutolwa kucikombelo ca Jehova. Babba cisani cibotu akucivwumbila. Tandiko kumuleleka kusikila mucinyonyoone cisani alimwi ayooyo wabweza zintu eezyi.’ Jehova wati ulamutondezya Josyuwa muntu ooyo mubi.
Kumane Josyuwa wabunganya bantu boonse, eelyo Jehova wati ngu Akani muntu mubi. Akani wati: ‘Ndabisya! Ndakacibona cisani cibotu acikoto cangolida azyibeela-beela zyansiliva. Ndali kuzyinyonekela lyoonse nkakaambo kaako ndazyibweza. Mulazyijana ndazyisisa kunsi aatente lyangu.’
Izintu eezyi nizyajanwa akuletwa kuli Josyuwa, Josyuwa wati kuli Akani: ‘Nkaambo nzi ncowatuletela mapenzi? Lino Jehova ulakuletela mapenzi!’ Mpamunya aawo boonse bantu bamupwaya mabwe Akani amukwasyi wakwe kusikila bafwa. Hena eeci tacitutondezyi kuti tatweelede kubweza zintu zitali zyesu?
Kumane boobo, Isilayeli waunka alimwi kwaakulwana Ayi. Luno lweendo Jehova wabagwasya bantu bakwe, eelyo bazunda munkondo.
Josyuwa 7:1-26; 8:1-29.
Mibuzyo
- Ngwani muntu acifwanikiso uuvwumbila lubono lwakazwa ku Jeliko, alimwi mbabaani bamugwasya?
- Nkaambo nzi Akani ncaakacita abamukwasyi wakwe ncocili cintu cibi kapati?
- Ncinzi Jehova ncaambila Josyuwa naamubuzya cakapa kuti bana Isilayeli bazundwe munkondo ku Ayi?
- Ncinzi cacitika kuli Akani abamukwasyi wakwe nibaletwa kuli Josyuwa?
- Nciiyo nzi ciyandika kapati ncotwiiya twalanga Akani mbwaakabetekwa?
Mibuzyo aimwi
- Bala Josyuwa 7:1-26.
Mbuti mipailo ya Josyuwa mboitondezya cilongwe ncaakajisi a Mulengi wakwe? (Jos. 7:7-9; Int. 119: 145; 1 Joh. 5:14)
Ino citondezya nzi cikozyanyo ca Akani, alimwi mbuti eeci mboili ncenjezyo kuli ndiswe? (Jos. 7:11, 14, 15; Tus. 15:3; 1 Timo. 5:24; Heb. 4:13)
- Bala Josyuwa 8:1-29.
Mukuli nzi aumwi ngwajisi kumbungano ya Banakristo sunu? (Jos. 7:13; Lev. 5:1; Tus. 28:13)
