¡KʼELA ja jasa wan smukjel ja bʼa snaj ja winik it! Jun kʼuʼal jel tsamal, jun lechan oro sok jujuntik sat plata. Tini ya eljan bʼa Jericó. Pe ¿jasun alji yabʼye oj skʼuluke soka jastik junuk bʼa Jericó? ¿Wana maʼ xjulakʼujol?

Ojni yaʼe chʼaysnajel ajyi, ja mero tini oj yiʼe och ja oro soka plata bʼa stabernáculo Jyoba. Ja yuj ja ixuk winik it skʼokoweta ja smandar ja Dyosi. Yelkʼuneje jastik junuk wa sbʼajin ja Dyosi. Ja winiki sbʼiʼil Acán, sok ja matik tey smoki jaʼ jujuntik ja bʼa spamilya.

Tsaʼan yajni ja Acán yelkʼan ja jastik junuki, Josué sjeka jujuntik winik bʼa oj waj tiroʼanuke soka chonabʼ Hai, pe kʼuljiye ganar. Jujuntik chamye, jaxa tuki elye ajnel. Josué jel och stristeʼil, koʼ tinan sok yaʼ yi orasyon ja Jyoba. Yala: «¿Jas yuj waxa waʼakan aʼekʼuk ja it?».

Jyoba sjakʼa: «¡Kʼeʼan! Ja israʼelenyo sleʼata smule. Yiʼoneje jastik junuk bʼa oj ajuk chʼayuk snajel ma tini oj yiʼe och ajyi bʼa jtabernáculo. Yelkʼuneje jun kʼuʼal jel tsamal sok me xyalawe. Mini oj koltaye masan oj ajuk chʼaysnajel ja kʼuʼutsi soka maʼ yelkʼuneji». Jyoba yala yabʼ ja Josué oj jejuk yi ja maʼ skʼulune ja jas junuk it mi lekuki.

Ja yuj ja Josué stsomo ja chonabʼi, soka Jyoba ya chiknajuk ja winik maʼ elkʼaneli: Acán. Ja yeʼn yala: «Jleʼata jmul. Kilani jun tsamal kʼuʼal, jun lechan oro sok jujuntik sat plata. Jel okʼ jkʼujol ja jastik junuk it ja yuj kiʼaj. Ti oj ataʼex mukan bʼa yojol ja jnaji».

Yajni chʼak taxuk ja jastik junuk elkʼubʼali sok yiʼawejan yi ja Josué, ja yeʼn yala yabʼ ja Acán: «¿Jas yuj achʼikonejotikon ja bʼa wokol it? ¡Ja yuj ja weʼgo ja Jyoba oj yijanawi wokol!». Anto spetsanil ja ixuk winiki xchʼojowe ton ja Acán soka spamilya masan chamye. ¿Mi maʼ sjeʼa ja it mi oj yamtik jastik junuk bʼa mi jbʼajuktik?

Yajkʼachil ekʼele ja israʼelenyo cha waj tiroʼanuke soka Hai. Ja ekʼele xa it, ja Jyoba skoltani ja xchonabʼi, soka yeʼnle skʼulane ganar.