AWONA ico mwanalume uyo wakuwundira mu hema lake! Wakuwundira munjilira uwemi, mupimintha wa golide, na siliva. Wavitora mu msumba wa Yeriko. Kweni kasi vinthu vya mu Yeriko ŵakenelanga kucita navyo wuli? Kasi ukukumbuka?

Ŵakenelanga kuviwocha, ndipo golide na siliva ŵakenelanga kukaŵika mu cihema ca Yehova. Ntheura ŵanthu aŵa ŵakana kupulikira Ciuta. Ŵiba vinthu vya Ciuta. Zina la mwanalume uyu ni Akani, awo wali nawo mbamoza ŵa pa mbumba yake. Tiye tiwone ico cikacitika.

Akani wati wiba vinthu ivi, Yoswa wakatuma ŵanalume kukarwa nkhondo na msumba wa Ai. Kweni ŵakathereskeka ku nkhondo. Ŵanyake ŵakakomeka, ŵanji ŵakacimbira. Yoswa wakaŵa na citima comene. Wakawa kavunama kulomba kwa Yehova: ‘Nchifukwa wuli mwazomelezga cinthu ici kuticitikira?’

Yehova wakazgora: ‘Wuka! Ŵaisrayeli ŵananga. Ŵatora vinthu ivyo vikenelanga kuwocheka panji kupelekeka ku cihema ca Yehova. Ŵakiba munjilira wakutowa na kuwubisa. Nimutumbikaninge yayi mupaka muwoche dankha munjilira na munthu uyo wali kwiba vinthu ivi.’ Yehova wakaphalira Yoswa kuti wamuvumburenge munthu muheni uyu.

Yoswa wakawunganya pamoza ŵanthu wose, ndipo Yehova wakakora Akani munthu muheni. Akani wakati: ‘Nananga. Nkhawona munjilira wakutowa, mupimintha wa golide, na siliva. Nkhavidokera comene mwakuti nkhavitora. Mwamuvisanga apo nkhaviwundira mu hema lane.’

Vinthu ivi vyati vyasangika na kwiza navyo kwa Yoswa, wakaphalira Akani kuti: ‘Kasi watisuzgiraci? Sono Yehova wakulangenge!’ Ŵanthu wose ŵakamudinya Akani na mbumba yake na malibwe mupaka ŵakafwa. Kasi ici cikutisambizga yayi kuti tileke kutora vinthu vyaŵene?

Pamanyuma pake Ŵaisrayeli ŵakalutaso kukarwa nkhondo na msumba wa Ai. Pa nyengo iyi Yehova wakawovwira ŵanthu ŵake kuthereska ŵarwani ŵawo.