Tantara 47

Nisy Mpangalatra Tan’israely

ZAHAVA lelahy amy tran̈olainy io mandevin̈y lamba tsara ndreky volamena matevin̈y, ndreky vola! Boaka ta Jerikô tan̈y nangalany raha jiaby io. Tôkony natao karakôry ma raha jiaby ta Jerikô tan̈y? Azonao onon̈o izin̈y?

Tsy maintsy niroan̈a raha jiaby ta Jeriko tan̈y. Volamena ndreky volafotsy fo mila naterin̈y tamy tabernakelin’i Jehovah. Dikan’izen̈y, olo aby io tsy nan̈araka volan̈a Zan̈ahary. Nangalarin-drô rahan’ny Zan̈ahary. Akana an̈aran̈a lelahy io, baka iô vadiny ndreky ry zanany miaraka aminany io. Alô zahavatsika raha nandalo tamy zen̈y.

Tafaran’ny nangalaran’Akana raha aby io, Josoa nandefa lelahy sasany hiady tamin’olo tamy tanàna Ay tan̈y. Resy irô tan̈y. Sasany tamin-drô naty, sasany nilefa. Nalahelo Josoa. Izy nankôhoko tamy tany, baka iô nivavaka tamy Jehovah. Volan̈iny: ‘Nan̈ino zahay nambelanao avoa raha kara’ty?’

Jehovah nivolan̈a: ‘Mitsangàna anao! Israely tsy nan̈araka volan̈a. Raha tôkony niroan̈a ndreky tôkony nalaifa amy tabernakelin’i Jehovah, nalain-drô. Irô nangalatra lamba tsara, baka iô raha io nasitrikin-drô. Zaho tsy han̈amia rady anarô izikoa tsy miboaka raha zen̈y, ndreky olo nangalatra izy.’ Jehovah nivolan̈a tamy Josoa fa haboakany lelahy ratsy fan̈ahy zen̈y.

Josoa koa fa namory olo jiaby amy zay, Akana navahan’i Jehovah. Akana nivolan̈a: ‘Zaho diso. Zaho nahita lamba tsara, volamena matevin̈y, ndreky vola. Tiako loatra raha aby io, ke nalaiko. Naleviko an̈aty tran̈olainakahy ao raha jiaby zen̈y.’

Koa fa hita raha jiaby zen̈y, naterin̈y tamy Josoa. Josoa nivolan̈a tamin’Akana: ‘Nan̈ino ma anao mampiditry lagin̈y amitsika? Iziô Jehovah hamaly ny ratsy nataonao!’ Olo jiaby amy zay nitaora-bato Akana ndreky vadiny, ndreky ry zanany, zisk’irô jiaby naty. Zen̈y mivolan̈a fa tsy mety mangala rahan’olo, tsy zen̈y?

Tafaran’izen̈y, Israely lôso niady ta Ay tan̈y. Tamin’io Jehovah nan̈ampy irô amy zay, ke irô nandresy.

Josoa 7:1-26; 8:1-29.