ALOLE yakusilila munduju mu tenti jakweyi! Akusilila mkanjo wakusalala, liganga lya golidi, soni silifa. Jwalakwe ajigele yeleyi mu msinda wa Yeliko. Ana akukumbucila yaŵasosekwaga kutenda nayo yindu ya ku Yeliko?

Ŵasosekwaga kuyijonanga, soni golidi ni silifa ŵasosekwaga kuyipeleka ku tenti jakulambilila Yehofa. Nambo ŵanduŵa nganapikanila Yehofa. Ajiŵile yindu ya Yehofa. Lina lya munduju lili Akani, soni ŵandu ŵali nawowo ali ŵa muliŵasa lyakwe. Kwende tulole yayatendece.

Akani ali ajiŵile yinduyi, Yoswa akwatumisya acalume ŵane kukuputa ngondo ni ŵandu ŵa mumsinda wa Ayi. Nambo jemanjaji akuputigwa pangondojo. Ŵane ŵawuleje, soni ŵane akutila. Yoswa ali jwakudandawula mnope. Jwalakwe akugona pasi camakuku ni kupopela kwa Yehofa kuti: ‘Ana ligongo cici akundile yeleyi kututendecela?’

Yehofa akwanga kuti: ‘Mnyakuce! Yisalayeli alemwisye. Ajigele yindu yayasosekwaga kuyijonanga kapena kuyipeleka ku tenti jakulambilila Yehofa. Ajiŵile mkanjo wakusalala ni kuwusisa. Ngasinampasoni majali akaŵe naga mkuyijonanga yinduyo, yimpepe ni mundu jwajiŵile yinduyo.’ Yehofa akumsalila Yoswa kuti camlosye mundu jwakusakalajo.

Sambano Yoswa akwasonganganya ŵandu wosope pamalo gampepe, ni Yehofa palikugalyo akusagula Akani mundu jwakusakala jula. Akani akuŵeceta kuti: ‘Ndemwisye. Une nawuweni mkanjo wakusalala, soni liganga lya golidi ni silifa. Ni nayisacile mnope mpaka nayijigele. Cakayisimane yesilile mkati mwa tenti jangu.’

Payisimene yinduyi ni kwika nayo kwa Yoswa, jwalakwe akum’wusya Akani kuti: ‘Ligongo cici m’yikasisye yakusawusyayi pa m’weji? Sambano Yehofa cayikasye yipwetesi pa mmwejo!’ M’yoyo ŵandu wosopewo ŵamponyisye maganga Akani yimpepe ni liŵasa lyakwe mpaka kuwa. Ana yeleyi ngayikulosya kuti m’weji ngatukusosekwa kujigala yindu yanganiyiŵa yetu?

Kaneko Ayisalayeli akwawulasoni kukuputa ngondo ni ŵandu ŵa ku Ayi. Pandaŵiji Yehofa akwakamucisya ŵandu ŵakwe, soni akupunda pa ngondojo.