ABANTU mu misumba iingi mu Kanaani baleipekanya ukulwa na bena Israele. Balemona kwati kuti bacimfya abena Israele. Lelo abantu abaleikala mupepi no musumba wa Gibeone balishibe ukuti te kuti bacimfye abena Israele pantu Lesa alebafwa. E ico tabalefwaya ukulwisha Lesa. Bushe nawishiba ico abena Gibeone bacitile?

Balengele camoneka kwati bafumine ukutali sana. Abaume bamo pali bena bafwele ifya kufwala ifyalepauka ne nsapato ishaonaika. Babikile amasaka yabo ayasampauka pa mpunda shabo, no kusenda umukate wa kale, uwauma. Lyena baile kuli Yoshua no kumweba ati: ‘Twafuma ku calo ca kutali pantu twalyumfwa ifingi pali Lesa wenu umukalamba, Yehova. Twalyumfwa fyonse ifyo amucitiile mu Egupti. E ico intungulushi shesu shatwebele ati tusende ifya kulya no kwima ubulendo no kwisamweba ati: “Tuli babomfi benu. Tulayeni ukuti tamwakalwe na ifwe.” Moneni fye ifyo ifya kufwala fyesu fisampawike ne fyo umukate wesu umine pa mulandu wa lwendo ubutali.’

Yoshua ne ntungulushi shimbi balisumine ifyo abena Gibeone balandile. E ico balibalaile ukuti tabakalwe nabo. Lelo pa numa ya nshiku shitatu, baishileishiba ukuti abena Gibeone bafumine fye apepi.

Yoshua abepwishe ati: ‘Cinshi mwalandiile ukuti mwafumine ku calo ca kutali?’

Abena Gibeone bayaswike ati: ‘Ico twalandiile ifyo, ni co twalyumfwa ukuti Lesa wenu, Yehova alimulaya ukumupeela icalo conse ica Kanaani. E ico twalitiinine ukuti mukatwipaya.’ Lelo abena Israele balicitile ico balaile, kabili tabaipeye abena Gibeone. Babebele ukuti babe abasha babo.

Imfumu ya mu Yerusalemu yalifulilwe sana ilyo abena Gibeone batampile ukumfwana na bena Israele. E ico iyi Imfumu yaebele imfumu shimbi 4 ati: ‘Iseni mungafwe ukulwisha abena Gibeone.’ Ne shi imfumu shonse 5 shaliile mu kulwa na bena Gibeone. Bushe abena Gibeone balicitile fye bwino ukutendeka ukumfwana na bena Israele, apo ukumfwana nabo e kwalengele ishi imfumu ukubalwisha? Twalamona.